თანაინვესტირების ფონდის ყოფილი ხელმძღვანელი გიორგი ბაჩიაშვილის ციხეში ცემის ფაქტს მისი ამერიკელი ადვოკატი რობერტ ამსტერდამი TV პირველის ეთერში გამოეხმაურა. მისი თქმით ის, რაც ბაჩიაშვილს მოუწყვეს, წამების მცდელობასთან ერთად გამოძალვის მცდელობაცაა და ეს ყველაფერი იმიტომ მოხდა, რომ ბაჩიაშვილი ივანიშვილისთვის პოლიტიკურ საფრთხეს წარმოადგენს.

"ის, რაც ბაჩიაშვილს მოუწყვეს არა მხოლოდ წამებას წარმოადგენს. ეს იშვიათი შემთხვევაა. სახეზე გვაქვს გამოძალვის მცდელობა. ჩვენთვის თავიდანვე ნათელი იყო, რომ საქმე არ ეფუძნებოდა არანაირ სამართლებრივ საფუძველს და მიზანი მხოლოდ ერთ რამეს ემსახურებოდა — ჩვენი კლიენტისთვის წაერთმიათ ქონება. ეს არის სწორედ გამოძალვის მექანიზმის ნაწილი. ერთი მხრივ, იმიტომ, რომ ბიძინა ივანიშვილს სჯერა, რომ საქართველოში ყველაფერი მას ეკუთვნის და მეორე მხრივ იმიტომ, რომ ბაჩიაშვილი მისთვის პოლიტიკურ საფრთხეს წარმოადგენს.

მე ვფიქრობ, რომ ბაჩიაშვილს აქვს ყველაფერი, რაც ივანიშვილს არ გააჩნია. მას აქვს უმაღლესი განათლება, პროფესიონალიზმით გამოირჩევა, კარგად ესმის დასავლური ღირებულებები და აქვს კარგი კონტაქტები. ივანიშვილი და ქართული ოცნების დაჯგუფება კი საპირისპიროს წარმოადგენს. ბაჩიაშვილის მიერ გავრცელებული განცხადების წაკითხვის შემდეგ აშკარაა, რომ მისი ცემის ბრძანება ივანიშვილის მხრიდან მოდიოდა. ამ ეტაპზე, კონსულტაციებს გავდივართ ადგილობრივ იურიდიულ გუნდთან და გადავდგამთ ყველა საერთაშორისო სამართლებრივ ნაბიჯს, რაც საჭირო იქნება იმისთვის, რომ უკანონო და ფაქტობრივად, კრიმინალურ დევნაში ჩართული პირები პასუხისგებაში მივცეთ", — განაცხადა რობერტ ამსტერდამმა.

ბაჩიაშვილის ადვოკატმა აღნიშნა ისიც, რომ ციხეში მომხდარი ამ ფაქტის დამალვა შეუძლებელია. მისივე თქმით, დრო ახლა ქართული ოცნების ნაცვლად, ხალხის მხარესაა.

"ვფიქრობ, რომ მსოფლიო ნელ-ნელა იღვიძებს და აცნობიერებს, რაც საქართველოში ხდება. ამასთან ერთად, შეუძლებელია დაიმალოს ის, რაც ციხეში მოხდა. ამიტომ ვფიქრობ, რომ დრო უკვე არ მუშაობს ქართული ოცნების სასარგებლოდ. დრო ხალხის მხარესაა", — თქვა უფლებადამცველმა.

14 ივლისს გავრცელდა ინფორმაცია, რომ თანაინვესტირების ფონდის ყოფილი ხელმძღვანელი გიორგი ბაჩიაშვილი გლდანის ციხეში სცემეს.

NEWS.On.ge-ს თავდაპირველად ბაჩიაშვილის ადვოკატმა, დავით ჯანდიერმა დაუდასტურა, რომ ის ნაცემი იყო. როგორც მან განგვიცხადა, ბაჩიაშვილი ციხის სამკურნალო დაწესებულებაში იყო მოთავსებული. კლინიკა "ვივამედის" კლინიკური დირექტორის, ზურაბ ჩხაიძის განცხადებით, ბაჩიაშვილი პარასკევს, 11 ივლისს, კლინიკაში სხეულის სხვადასხვა დაზიანებით შეიყვანეს. მისი თქმით, ბაჩიაშვილს ასევე აღენიშნებოდა ღია ჭრილობები თავის არეში. ჩხაიძის ცნობით, ბაჩიაშვილი კლინიკაში გადაყვანიდან რამდენიმე საათში უკან, ციხეში დააბრუნეს.

თანაინვესტირების ფონდის ყოფილი ხელმძღვანელი წერილში წერს, რომ 8 ივლისს მე-8 დაწესებულების ხელმძღვანელმა, დავით გოგობერიშვილმა მოინახულა და ურჩია, რომ "ივანიშვილისთვის მთელი მისი საბანკო ანგარიშები, კრიპტოვალუტების ბრუნვები და ანგარიშის მისამართები გაეხსნა". მას შემდეგ რაც ბაჩიაშვილისგან უარი მიიღო, დაემუქრა. 11 ივლისს კი ის საკანში უცნობმა პირმა სცემა.

• "მკაფიო წამება სახელმწიფო ზედამხედველობის ქვეშ" — რობერტ ამსტერდამი გიორგი ბაჩიაშვილის ცემაზე
• გიორგი ბაჩიაშვილის ადვოკატი: დამოუკიდებლად გადაადგილება უჭირს. ტვინის შერყევა და რამდენიმე ადგილზე ნაკერები აქვს
• Amnesty international: "აუცილებელია [გიორგი ბაჩიაშვილის] განცხადებების დამოუკიდებელი გამოძიება"
• სალომე ზურაბიშვილი: სწორედ ამ უსასტიკესი მოქმედებებისა და ციხეებში უსამართლო მოქცევის გამო დამთავრდა წინა რეჟიმი".
• "მთელი მართლმსაჯულების სისტემა პირადი შურისძიების ინსტრუმენტია ბიძინა ივანიშვილის ხელში" — "ფედერალისტები" გიორგი ბაჩიაშვილის ცემას ეხმაურებიან
• "იყო სხეულის დაზიანებები სხვადასხვა ადგილზე და ღია ჭრილობები თავის არეში" — ზურაბ ჩხაიძე ბაჩიაშვილზე