"სწორედ ჩვენი საერთო ბრძოლის, რუსთაველზე დგომის, გაუტეხლობის შედეგია ის, რაც კაია კალასისგან მოვისმინეთ, რომ ევროპამ ქართულ ოცნებას კონკრეტული 8 მოთხოვნით მიმართა იმისთვის, რომ ურთიერთობების გაგრძელება შესაძლებელი იყოს — გუშინ მკაფიოდ გამოჩნდა, რომ ევროკავშირი და ქართული ოცნება შეუთავსებელია, ეს ორი ერთად შეუძლებელია," — ასე ეხმაურება კოალიცია ცვლილებისთვის ლიდერი ელენე ხოშტარია საგარეო საქმეთა და უსაფრთხოების პოლიტიკის საკითხებში ევროკავშირის უმაღლესი წარმომადგენლის, კაია კალასის გადაწყვეტილებას, რომ ოცნებას პირობების შესასრულებლად "დედლაინი" აგვისტოს ბოლომდე მიეცეს.

ელენე ხოშტარიას თქმით, "ქართული ოცნების პირობებში ქვეყანა კარგავს არამხოლოდ ევროპის პერსპექტივას, არამედ იმ მონაპოვარსაც, რომელიც ათწლეულების ბრძოლით არის მოპოვებული და რომელიც საქართველოს ყველა მოქალაქისთვის ძალიან მნიშვნელოვანია".

"ეს არის გზავნილი, რომ ამ ბრძოლაში მარტო არ ვართ და მსოფლიოში წამყვანი ქვეყნების საგარეო საქმეთა მინისტრები იმავე მოთხოვნებს უყენებენ ქართულ ოცნებას. ამასთანავე, გუშინ მკაფიოდ გამოჩნდა, რომ ევროკავშირი და ქართული ოცნება შეუთავსებელია — ეს ორი ერთად შეუძლებელია. ქართული ოცნების პირობებში ვკარგავთ არამხოლოდ ევროპის პერსპექტივას, არამედ იმ მონაპოვარსაც, რომელიც ათწლეულების ბრძოლით არის მოპოვებული და რომელიც საქართველოს ყველა მოქალაქისთვის ძალიან მნიშვნელოვანია. ეს არის უვიზო მიმოსვლა და ის სიკეთეები, რაც მიუხედავად პოლიტიკური პოზიციისა, ყველასთვის ძალიან მნიშვნელოვანია. ამ მონაპოვრის დაცვისთვის, იმისთვის, რომ საქართველო ევროპულ გზაზე დაბრუნდეს, იმისთვის, რომ სამართლიანობა დაბრუნდეს საქართველოში და იმისთვის, რომ ჩვენ წარმატებული ევროპული სახელმწიფო ვიყოთ, უნდა ვებრძოლოთ ქართულ ოცნებას, რომელიც ამ მომავალთან შეუთავსებელია. ამ ბრძოლის ერთადერთი გზა არის წინააღმდეგობა, ართანამშრომლობა, რეჟიმის იზოლაცია და დემონტაჟი," — განაცხადა ელენე ხოშტარიამ.

მან საზოგადოებას მოუწოდა 19 ივლისს, შაბათს, 19:00 საათზე თსუ-სთან დაგეგმილ აქციას შეუერთდნენ.

შეგახსენებთ, საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, კაია კალასმა ევროკავშირის საგარეო საქმეთა მინისტრების საბჭოს სხდომის დასრულების შემდეგ გამართულ პრესკონფერენციაზე ოცნების ხელისუფლებისთვის გაგზავნილ წერილზე საუბრისას განაცხადა, რომ მათ აგვისტოს ბოლომდე მისცეს ვადა საქართველოს ვიზალიბერალიზაციის შეფასების მეშვიდე ანგარიშში ჩამოთვლილი რეკომენდაციების შესასრულებლად. მისი თქმით, თუ მთავრობა პირობას არ შეასრულებს, ამას შედეგი მოჰყვება.

ასევე იხილეთ: