თეთრი სახლის პრესმდივნის, სარა სანდერსის თქმით, აშშ-ის ფხენიანისთვის ომი არ გამოუცხადებია და ჩრდილოეთ კორეამ პროვოკაციული განცხადებებისგან თავი უნდა შეიკავოს. სანდერსი გაკეთებულ განცხადებას აბსურდულს უწოდებს.

ჩრდილოეთ კორეის საგარეო საქმეთა მინისტრმა განაცხადა, რომ აშშ-მა მათ ომი პირველმა გამოუცხადა. ამის შესახებ მან გაეროს ასამბლეაზე ისაუბრა.

"ჩვენს ქვეყანას აქვს სრული უფლება, რომ ამერიკული თვითმფრინავები ჩამოაგდოს, მაშინაც კი, თუ ისინი ჩვენს საჰაერო სივრცეში არ არიან," - განაცხადა საგარეო საქმეთა მინისტრმა ასამბლეის დასრულების შემდეგ.

19 სექტემბერს, აშშ-ის პრეზიდენტმა დონალდ ტრამპმა გაეროს გენერალური ასამბლეის სადებიუტო გამოსვლაში ჩრდილოეთ კორეის საკითხზე ისაუბრა. მისი თქმით, საჭიროების შემთხვევაში ამერიკა საკუთარი თავისა და მოკავშირეების დასაცავად ჩრდილოეთ კორეას გაანადგურებს.

რამდენიმე დღის შემდეგ საპასუხო განცხადება გააკეთა ჩრდილოეთ კორეის ლიდერმა, კიმ ჩენ ინიმ. მისი თქმით, აშშ-ის "შეშლილი" პრეზიდენტის განცხადებამ ატომური იარაღის განვითარების აუცილებლობაში დაარწმუნა. კიმის განცხადებით, ის აიძულებს ტრამპს, პასუხი აგოს თავისი სიტყვების გამო.