"მე იმედგაცრუებული ვარ რუსეთით, მაგრამ ვნახოთ, რა მოხდება მომდევნო რამდენიმე კვირის განმავლობაში" — ამის შესახებ ამერიკის შეერთებული შტატების პრეზიდენტმა დონალდ ტრამპმა უკრაინაში მიმდინარე პუტინის ომზე საუბრისას NBC News-ს განუცხადა.

"ვფიქრობ, ორშაბათს მნიშვნელოვანი განცხადება მექნება რუსეთზე" — განაცხადა მან და დეტალების თქმისგან თავი შეიკავა.

ტრამპი პუტინის ომზე საუბრისას სხვა მნიშვნელოვან საკითხსაც შეეხო. მან დაადასტურა, რომ აშშ უკრაინას იარაღების ახალ პაკეტს NATO-ს გავლით მიაწვდის.

"იარაღი მიდის NATO-ში, შემდეგ NATO ამ იარაღს [უკრაინას] გადასცემს და NATO იხდის ამ იარაღისთვის" — განაცხადა ტრამპმა.

მისივე თქმით, შეთანხმებას გასულ თვეში NATO-ს სამიტზე მიაღწიეს.

ამასთან, ტრამპმა საჯაროდ გამოხატა თავისი უკმაყოფილება რუსეთის პრეზიდენტის, ვლადიმერ პუტინის მიმართ. ოთხშაბათს, რუსეთმა კიევზე სასიკვდილო დარტყმა და სარაკეტო შეტევა განახორციელა, რითაც ტრამპის გაფრთხილებები უგულებელყო.

ცნობისთვის, აშშ-მა ამ კვირაში განაახლა უკრაინისთვის იარაღის მიწოდება.