BMG-ს ინფორმაციით, საქართველოს ეროვნული ბანკი აცხადებს, რომ საფინანსო სექტორის SWIFT სისტემიდან გათიშვის არანაირი რეალური საფუძველი არ არსებობს. როგორც სებ-ში განმარტავენ, ქვეყნის საბანკო სექტორი მკაცრად იცავს როგორც ეროვნული კანონმდებლობის მოთხოვნებს, ისე მოქმედ საერთაშორისო სანქციებს.

ეს კომენტარი ეროვნული ბანკის მხრიდან მას შემდეგ გავრცელდა, რაც ევროპარლამენტმა საქართველოსთან დაკავშირებით კრიტიკული რეზოლუცია მიიღო. დოკუმენტში, სხვა საკითხებთან ერთად, საუბარია მოსალოდნელ სანქციებზე, მათ შორის, საქართველოს SWIFT სისტემიდან გათიშვაზე ან სექტორულ შეზღუდვებზე, რაც მიზნად ისახავს ქართული ოცნების ფინანსურ იზოლაციას.

სებ-ში ხაზგასმით აღნიშნავენ, რომ ზედამხედველობის პროცესი უწყვეტად მიმდინარეობს როგორც ადგილზე, ასევე დისტანციურად და ქვეყნის საფინანსო სისტემის შესაბამისობას საერთაშორისო სანქციების ჩარჩოებთან უცხოელი პარტნიორები დადებითად აფასებენ.

"სებ-ის მიერ როგორც ადგილზე, ასევე დისტანციური ზედამხედველობის ფარგლებში, უწყვეტად ხორციელდება შესაბამისი ზედამხედველობის პროცესიც.

საქართველოს საბანკო-საფინანსო სექტორის სანქციების რეჟიმებთან სრულ შესაბამისობას დადებითად აფასებენ ჩვენი უცხოელი პარტნიორები.

მაღალია ფულის გათეთრების აღკვეთის კუთხით საერთაშორისო სტანდარტებთან საფინანსო სექტორის შესაბამისობის დონე, რაც ასევე დასტურდება ევროპის საბჭოს ექსპერტთა კომიტეტის (MONEYVAL) შეფასებებით. ასევე, პერმანენტულად დადებით შეფასებას იმსახურებს სებ-ის ძალისხმევა საფინანსო სისტემის და კანონმდებლობის ევრო რეგულაციებთან დაახლოების კუთხითაც. სისტემა გამორჩეულად გამჭვირვალეა და შესაბამისად, მზარდია ინვესტორების ნდობა მის მიმართ.

ყოველივე ზემოაღნიშნულის გათვალისწინებით, გვინდა აღვნიშნოთ, რომ არ არსებობს მსოფლიო ბანკთაშორისი საფინანსო ტელეკომუნიკაციების საზოგადოებიდან (SWIFT) ქართული საფინანსო სისტემის გათიშვის საფუძველი," — განუცხადეს BMG-ს ეროვნული ბანკის წარმომადგენლებმა.