ოცნების პარლამენტში დღეს დიპლომატიურ სამსახურში დაგეგმილ ცვლილებებს განიხილავენ.

"დიპლომატიური სამსახურის შესახებ" კანონს ემატება ნორმები, რომელიც დიპლომატებს ეთიკისა და ქცევის წესების დაცვას ავალდებულებს. ჩაითვლება თუ არა ეთიკის დარღვევად პროევროპულ პეტიციაზე ხელმოწერა? — მინისტრის მოადგილემ, ხათუნა თოთლაძემ ამ კითხვაზე "ფორმულას" ჟურნალისტს არ უპასუხა.

ოცნების პარლამენტის მიერ გავრცელებულ ინფორმაციით, თავდაცვისა და უშიშროების კომიტეტმა პირველი მოსმენით, დაჩქარებული წესით, "დიპლომატიური სამსახურის შესახებ" კანონში შესატანი ცვლილებები განიხილა, რომელიც სხდომაზე ოცნების საგარეო საქმეთა

მინისტრის მოადგილემ, ხათუნა თოთლაძემ წარადგინა.

მისი განმარტებით, კანონის მოძველებული ნორმები ვერ პასუხობენ თანამედროვე გამოწვევებს, ამიტომ ხდება კანონით დადგენილი ნორმების დახვეწა და არსებულ რეალობასთან მორგება.

ცვლილების თანახმად, დიპლომატიური სამსახურის ფასეულობებსა და პრინციპებს ემატება ისეთი ნორმები, რომელთა დაცვაც აუცილებელია დიპლომატიურ სამსახურში დასაქმებულ პირთათვის, დიპლომატიური სამსახურის პრინციპების, საჯარო ინტერესების, ეთიკისა და ქცევის ზოგადი წესების განუხრელად დაცვის უზრუნველსაყოფად.

ამას გარდა, წარმოდგენილი ცვლილებებით, დიპლომატიური თანამდებობის პირებისთვის და ადმინისტრაციული პერსონალისთვის როტაციის ვადის გაგრძელების შესაძლებლობა იზრდება ერთ წლამდე ვადით. გარდა ამისა, ტექნიკური ხასიათის ცვლილებები ხორციელდება კანონის იმ ნორმებში, რომელიც ითვალისწინებს როტაციის წესით გრძელვადიან სამუშაო მივლინებაში წარგზავნისა და მივლინებიდან გამოწვევის საკითხებს.როგორც მომხსენებელმა განმარტა, როტაციის წესით გრძელვადიან სამუშაო მივლინებასთან დაკავშირებული საკითხები ასევე, გავრცელდება საქართველოს თავდაცვის სამინისტროს წარმომადგენლებზე, თავდაცვისა და უსაფრთხოების ატაშეებზე, აგრეთვე, მეკავშირე ოფიცერზე, ევროჯასთში მეკავშირე პროკურორსა და მის დამხმარეზე.

პროექტის თანახმად, თავდაცვის ატაშეს, საქართველოს თავდაცვის სამინისტროს წარმომადგენლის და მათ აპარატებში დასაქმებული პირების სამსახურის გავლასთან დაკავშირებული სამართლებრივი ურთიერთობები განისაზღვრება საქართველოს თავდაცვის მინისტრის სამართლებრივი აქტით, სამინისტროსთან შეთანხმებით, — ნათქვამია ოცნების პარლამენტის ვებგვერდზე გავრცელებულ ინფომრაციაში.

1-ელ მაისს, ლელო-ძლიერი საქართველოს წევრმა გრიგოლ გეგელიამ დღეს ბრიფინგზე განაცხადა, რომ ოცნების ხელისუფლების საგარეო საქმეთა მინისტრი ევროპული ინტეგრაციის გენერალურ დირექტორატს აუქმებს და თანამშრომლების გათავისუფლებას გეგმავს. გრიგოლ გეგელიას თქმით, მაკა ბოჭორიშვილი "პოლიტიკურ წმენდას იწყებს სამინისტროში" და ათავისუფლებენ 250 ადამიანს.