12 მაისს, პაპი ლეო XIV ვატიკანში მსოფლიოს სხვადასხვა კუთხიდან ჩამოსულ მედიის წარმომადგენლებს შეხვდა, რომლებიც რომში პაპ ფრანცისკეს გარდაცვალებიდან კონკლავის დასრულებამდე მოვლენების გასაშუქებლად ჩავიდნენ.

პავლე VI-ის დარბაზში სტუმრების მისასალმებლად რომის ეპისკოპოსმა აღნიშნა, რომ ეკლესიისთვის მიმდინარე პერიოდი, უპირველეს ყოვლისა, მადლიერების დროა. უფლის მცნების "ნეტარ არიან მშვიდობისმყოფელნი" გახსენებით, წმინდა მამამ მოუწოდა "მშვიდობისმყოფელი" კომუნიკაციისკენ, რომელიც თავისუფალი იქნება ბოროტებისგან, მეტოქეობისა და დაპირისპირებისგან. მისი თქმით, ჟურნალისტმა სიმართლე უნდა ეძებოს, მაგრამ არასდროს უნდა გამოაცალკეოს ის სიყვარულისგან, რადგან მშვიდობა თითოეული ჩვენგანიდან იწყება.

რომის პაპმა სოლიდარობა გამოუცხადა დაპატიმრებულ ჟურნალისტებს, რომლებიც ხალხის ინფორმირების უფლებისთვის იბრძვიან და მათი გათავისუფლებისკენ მოწოდება გააკეთა. პაპმა აღნიშნა იმ ადამიანების გამბედაობა, რომლებიც სიცოცხლეს საფრთხეში იგდებენ ომებზე საუბრით.

"ნება მომეცით, გავიმეორო ეკლესიის სოლიდარობა იმ ჟურნალისტების მიმართ, რომლებიც ჭეშმარიტების ძიებისა და გადმოცემისთვის პატიმრობაში არიან და მოწოდებით გამოვიდე მათი გათავისუფლებისკენ. ამ სიტყვებით პატიმრობაში მყოფი ჟურნალისტების გათავისუფლებას ვითხოვ.

ვფიქრობ იმ [ჟურნალისტების] შესახებ, თავიანთი სიცოცხლის ფასადაც კი რომ აშუქებენ ომს; იმ ადამიანების სიმამაცეზე, რომლებიც იცავენ ღირსებას, სამართლიანობას და ადამიანების უფლებას, იყვნენ ინფორმირებულები, ვინაიდან მხოლოდ ინფორმირებულ ინდივიდებს შეუძლიათ თავისუფალი არჩევანის გაკეთება.

პატიმრობაში მყოფი ჟურნალისტების ტანჯვა ერთა და საერთაშორისო საზოგადოების სინდისს გამოწვევის წინაშე აყენებს, მოგვიწოდებს ყველა ჩვენგანს, დავიცვათ სიტყვისა და პრესის თავისუფლების ძვირფასი საჩუქარი. გმადლობთ, ძვირფასო მეგობრებო, სიმართლის წინაშე თქვენი სამსახურისთვის", — განაცხადა პაპმა (ტაბულას თარგმანი).

ლეო XIV-მ მადლობა გადაუხადა პრესას რომში მომხდარი უახლესი მოვლენების გაშუქებისთვის.