ვატიკანში კონკლავის პირველ დღეს, კათოლიკე კარდინალებმა 267-ე პაპის არჩევას ვერ შეძლეს. ამას მოწმობს შავი კვამლი, რომელიც ოთხშაბათს, 7 მაისს, საღამოს, სიქსტის კაპელის სახურავზე არსებული საკვამურიდან გამოვიდა. კარდინალები რომის კათოლიკური ეკლესიის ახალი მეთაურის არჩევნებს 8 მაისს გააგრძელებენ.

კონკლავის დაწყებიდან სამი საათის შემდეგ, რომელშიც მსოფლიოს სხვადასხვა კუთხიდან 133 კარდინალი მონაწილეობდა, სიქსტის კაპელის თავზე შავი კვამლი გამოჩნდა. ეს რომის კათოლიკური ეკლესიის ისტორიაში დღემდე ყველაზე მასშტაბური კონკლავია. AFP-ის ცნობით, წმინდა პეტრეს მოედანზე ათიათასობით ადამიანი ელოდა პირველი კონკლავის შედეგებს.

კონკლავის დაწყებამდე კარდინალებმა ფიცი დადეს, რომ ხმის მიცემის პროცესს საიდუმლოდ შეინახავდნენ. ისინი ახლა პრაქტიკულად საზოგადოებისგან იზოლირებულნი არიან მანამ, სანამ 21 აპრილს გარდაცვლილი პაპი ფრანცისკეს მემკვიდრეს არ აირჩევენ.

გამარჯვებისთვის კანდიდატმა უნდა მიიღოს ხმების მინიმუმ ორი მესამედი, ანუ 133 შესაძლოდან 89. ახალი პაპი აირჩიეს თუ არა, შეგიძლიათ გაიგოთ კვამლის მიხედვით, რომელიც თითოეული კონკლავის შემდეგ სპეციალურად დამონტაჟებული საკვამურიდან გამოდის: შავი კვამლი ნიშნავს, რომ პაპი ვერ აირჩიეს, ხოლო თეთრი კვამლი — რომ აირჩიეს.

AFP აღნიშნავს, რომ კონკლავის წინა პერიოდში არსებობდა ვარაუდები, რომ კარდინალების დიდმა რაოდენობამ და ამომრჩეველთა მაღალმა პროპორციამ შესაძლოა ახალი პაპის არჩევის პროცესი შეანელოს. კონკლავები, რომლებზეც წინა პაპები — ფრანცისკე, ბენედიქტე XVI და იოანე პავლე II - აირჩიეს, ორ-სამ დღეს გაგრძელდა. ყველაზე ხანგრძლივი კონკლავი თითქმის სამ წელს გაგრძელდა. ეს იყო XIII საუკუნის მეორე ნახევარში.