69 წლის ამერიკელი კარდინალი რობერტ პრევოსტი რომის კათოლიკური ეკლესიის ახალ მეთაურად აირჩიეს. ის ცნობილი იქნება, როგორც პაპი ლეო XIV.

კარდინალი დომინიკ მამბერტი ვატიკანში, წმინდა პეტრეს ბაზილიკის აივანზე გამოვიდა და ლათინურად გამოაცხადა: Habemus Papam!, რაც ნიშნავს “ჩვენ გვყავს პაპი”. შემდეგ მან ახალი პაპი წარადგინა და ეკლესიის მეთაურად მისი ახალი სახელი გამოაცხადა.

რამდენიმე წუთის შემდეგ აივანზე თავად ახალი პაპი გამოჩნდა.

თავის გამოსვლაში ლეო XIV-მ მადლობა გადაუხადა წინა პაპ ფრანცისკეს და ისაუბრა ხალხებს შორის ხიდების აგების აუცილებლობაზე. მისი პირველი სიტყვები კი ასეთი იყო: "მშვიდობა თქვენდა!"

"ბოროტება ვერ გაიმარჯვებს. ყველანი ღვთის ხელში ვართ. უშიშრად, ერთად, ხელიხელჩაკიდებულები ღმერთთან და ერთმანეთთან, ჩვენ წინ წავალთ. ჩვენ ქრისტეს მოწაფეები ვართ, ქრისტე წინ მიგვიძღვის და სამყაროს მისი ნათელი სჭირდება. კაცობრიობას სჭირდება ქრისტე, როგორც ხიდი ღმერთთან და მის სიყვარულთან მისაღწევად. დაგვეხმარეთ და დავეხმაროთ ერთმანეთს ხიდების აგებაში", — განაცხადა პაპმა.

აშშ-ის პრეზიდენტი დონალდ ტრამპი ახალი პაპის არჩევის შესახებ ინფორმაციას მალევე გამოეხმაურა.

"ვულოცავ კარდინალ რობერტ ფრენსის პრევოსტს, რომელიც ახლახან გახდა პაპი. დიდი პატივია იმის ცოდნა, რომ ის პირველი ამერიკელი პაპია, „ეს ძალიან სასიხარულოა და უდიდესი პატივია ჩვენი ქვეყნისთვის. მოუთმენლად ველი პაპ ლეო XIV-სთან შეხვედრას. ეს ძალიან მნიშნველოვანი მომენტი იქნება!", — დაწერა ტრამპმა სოციალურ ქსელ Truth Social-ზე.

ახალი პაპი კონკლავმა 8 მაისის, საღამოს, მეოთხე სესიაზე აირჩია.

გამარჯვებისთვის კანდიდატს უნდა მიეღო ხმების მინიმუმ ორი მესამედი, ანუ 89-დან 133-მდე ხმა. პაპის არჩევას საზოგადოება კვამლის ფერის მიხედვით იგებს, რომელიც თითოეული კონკლავის შემდეგ სპეციალურად დამონტაჟებული საკვამურიდან გამოდის: შავი კვამლი ნიშნავს, რომ პაპი ვერ აირჩიეს, ხოლო თეთრი კვამლი — რომ აირჩიეს.

კონკლავები, რომლებზეც წინა პაპები — ფრანცისკე, ბენედიქტე XVI და იოანე პავლე II — აირჩიეს, ორ-სამ დღეს გაგრძელდა. ყველაზე ხანგრძლივი კონკლავი თითქმის სამ წელს გაგრძელდა. ეს იყო XIII საუკუნის მეორე ნახევარში.

პირველი ამერიკელი პაპი

კარდინალი რობერტ ფრენსის პრევოსტი, რომელიც პაპი გახდა, წარმოშობით ჩიკაგოდანაა, თუმცა კარიერის უმეტესი ნაწილი მისიონერად პერუში გაატარა. შესაბამისად, ისიც ამ ქვეყნის მოქალაქეა.

ის კარდინალად მხოლოდ 2023 წელს აკურთხეს და კათოლიკური ეკლესიის ლიდერობის ყველაზე აშკარა კანდიდატი არ იყო. ამჟამინდელი პაპი ჟურნალისტებთან დიდად არ ურთიერთობდა და საჯაროდ იშვიათად გამოდიოდა.

Reuters-ის ცნობით, 2023 წელს პაპმა ფრანცისკემ კარდინალი პრევოსტი რომში დაიბარა და ის მთელ მსოფლიოში კათოლიკე მღვდლებისა და ეპისკოპოსების დანიშვნის ოფისის ხელმძღვანელად დანიშნა.

ვატიკანში გამართულ პრესკონფერენციაზე მან განაცხადა: "ჩვენი საქმეა ჩვენი წრის გაფართოება, გვინდა, რომ ყველამ იცოდეს ჩვენი სურვილის შესახებ, ყველა მივიღოთ ეკლესიაში".

როგორც BBC-ის რელიგიის კორესპონდენტი იუწყება, კონკლავის წინ საუბარი იყო იმაზე, რომ კათოლიკურ ეკლესიას სჭირდებოდა ვინმე, ვინც პაპ ფრანცისკის მემკვიდრეობას გააგრძელებდა. წინა პაპი ცდილობდა ეკლესიის გარეგან ჯგუფებთან დაკავშირებას, თუმცა ასევე ცდილობდა ფართო სპექტრის ადამიანების ჩართვას, მათ შორის მათ, ვინც მას არ ეთანხმებოდა.

კონკლავამდე კარდინალი პრევოსტი სწორედ ამ ამოცანის შესრულების: სხვადასხვა სამყაროს შორის ხიდების აგების უნარის მქონე კანდიდატად ითვლებოდა. ჩვენი კორესპონდენტის თქმით, იმ ფაქტით თუ ვიმსჯელებთ, რომ კარდინალებს ხმის მიცემის მხოლოდ ოთხი რაუნდი დასჭირდათ, ისინი ამ მოსაზრებას დაეთანხმნენ.