ბათუმის აქციების მედროშე თემურ ქათამაძე საპატიმროდან მორიგ წერილს აქვეყნებს, რომელშიც მიგრაციის დეპარტამენტის ადმინისტრაციის მხრიდან პერმანენტულ ფსიქოლოგიურ ზეწოლაზე, დამცირებასა და ღირსების შემლახავ მოპყრობაზე საუბრობს.

ქათამაძის წერილი ახალგაზრდა იურისტთა ასოციაციამ გამოაქვეყნა.

წერილს უცვლელად გთავაზობთ:

"საქართველოს საზოგადოების, თანამებრძოლებისა და კრიტიკული მედიის ინფორმირებისთვის, მასზე განხორციელებული ზეწოლის შესახებ, “ბათუმელი მედროშის”, თემურ ქათამაძის მიერ ციხიდან გამოგზავნილი წერილი:

დღეს უკვე საჭირო გახდა. მინდა გაცნობოთ, რომ 16.01.2025-ში, ჩემი საქართველოდან გაძევების მიზნით დაკავების პირველი დღიდან დღედმე, მიგრაციის დეპარტამენტის ადმინისტრაციის ხელმძღვანელების მიერ ხორციელდება ჩემ მიმართ მიზანმიმართული, მუდმივი და მასშტაბური ფსიქოლოგიური ზეწოლა, შევიწროება, შეფურთხება, გაჭიანურება და პროვოცირება ყველანაირი ბერკეტის გამოყენებით.

ეს თავიდან იყო ჩემ მიმართ სასამართლო პროცესებში წარსადგენად ბათუმში, ჩემს კერძო ბინაში და პირად კომპიუტერში განთავსებულ დოკუმენტებზე – მტკიცებულებებზე წვდომისა და მათი დროზე შეგროვების შეფერხების მიზნით. თუმცა, ბოლო დღეებში, მათი ზეწოლა გამიზნული არის 44 დღის განმავლობაში უწყვეტად მიმდინარე ჩემი შიმშილობის შეწყვეტისთვის, ჩემი ნებისყოფის და მხნეობის გატეხისთვის. მათთვის რა სამწუხაროა, რომ უშედეგო იქნება მათი ეს მცდელობა, რომ ჩემი სამშობლოსთვის ბრძოლის შეურყევ ნებისყოფას, სულისკვეთებას და მხნეობას ვერასდროს ვერავინ გატეხა! სამშობლოს სიყვარული და მისთვის თავდადება ჩემს ცხოვრებაში ყველაზე ზემოთ მდგომი ღირებულება და მწვერვალი არის. იმის ზემოთ მხოლოდ გამჩენელი ღმერთი დგას!

მე აქ ძალიან კარგად და მხნედ ვარ. ისე, როგორც არასდროს არ ვყოფილვარ. ჩემი სოლიდარობა სამშობლოს მომავლის და თავისუფლების ყველა თანამებრძოლს და ასევე, სინდისის ყველა პატიმარს!

მინდა ყველამ იცოდეთ და დარწმუნდეთ, რომ ჩვენ ვართ საქართველო, უფალი არს ჩვენთან, მე მჯერა გამარჯვების! ჩვენ გადავცურავთ ზღვას და აუცილებლად გავიმარჯვებ სახელოვნად.

უფრო და უფრო დიდი ცეცხლი ოლიგარქიას და მუდმივი ჯოჯოხეთი ივანიშვილს.

ჩვენი ბრძოლის ყოველ წამს გახსოვდეთ საქართველოს ეროვნული გმირის, გიორგი ანწუხელიძის შემდეგი სიტყვები: არასოდეს, არასოდეს არ დანებდე!”.

ბრძოლა უნდა გაგრძელდეს ბოლომდე, გამარჯვებამდე, არ დანებდეთ! “ძალა ერთობაშია!”

ბათუმელი მედროშე, თემურ ქათამაძე. 28.02.2025 წელი.

შიმშილობის 44-ე დღე.

თბილისი – სამშობლო," — წერს თემურ ქათამაძე წერილში