გულშემატკივრები ოსკარების დაჯილდოების ცერემონიალს ახალი წესის გამო "ხუმრობას" უწოდებენ. წესის მიხედვით აკადემიის წევრებს კატეგორიებში ხმის მიცემამდე ყველა ნომინირებული ფილმის ყურება მოუწევთ.

როგორც მიხვდით, აკადემიამ ოსკარისთვის რამდენიმე ახალი წესი დაამატა. ხალხს კი ის უკვირს, ეს კონკრეტული წესი თავიდანვე სავალდებულო რატომ არ იყო.

"აკადემიის წევრებს ახლა ყველა ნომინირებული ფილმის ნახვა მოუწევთ კონკრეტულ კატეგორიაში, რათა მიიღონ ხმის მიცემის უფლება ფინალურ ეტაპზე" — ვკითხულობთ ოფიციალურ პრესრელიზში.

ახალი წესი აკადემიის მმართველთა საბჭომ ორშაბათს დაადასტურა.

იმის დასამტკიცებლად, რომ შემფასებელმა ფილმი ნახა, აკადემია გამოიყენებს შიდა პლატფორმას: Academy Screening Room — სადაც წევრებს შეუძლიათ ნომინირებულ ფილმებს ონლაინ უყურონ.

ფოტო: Yahoo

"ჟიურის წევრებს მოუწევთ შეავსონ სპეციალური ფორმა ფინალურ ხმის მიცემამდე. თუ რომელიმე ფილმი არ გაქვთ ნანახი, იმ კატეგორიაში ხმის მიცემა შეუძლებელი იქნება (გრაფა დაბლოკილი იქნება). სპეციალიზებული კატეგორიებისთვის კვლავ სავალდებულო იქნება ფილმის ყურება როგორც წინასწარი შერჩევის, ისე ნომინაციის ეტაპებზე. ამ წლიდან კი მსგავსი წესი დამატებით ყველა კატეგორიასა და ყველა წევრისთვის ფინალურ ეტაპზეც სავალდებულო ხდება " — ვკითხულობთ აკადემიის განცხადებაში.

აკადემიის 97 წლიანი არსებობის განმავლობაში, ჟიურის წევრებს უბრალოდ სთხოვდნენ, არ მიეცათ ხმა, თუ ყველა ფილმი ნანახი არ ჰქონდათ. პროცესი სრულად ნდობაზე იყო დამყარებული.

სამწუხაროდ, ეს პირველი შემთხვევა არ არის, როცა აკადემიის უცნაური ხმის მიცემის სისტემა კრიტიკის საგანი ხდება. ბოლო წლებში ანონიმურმა წევრებმა დაარღვიეს დუმილი და აღიარეს, რომ ზოგ ფილმს უყურადღებოდ ტოვებდნენ ან საერთოდ არ უყურებდნენ.

მართლაც უცნაურია, როგორ მოახერხა ამ სისტემამ ჰოლივუდში აურზაურის გარეშე ამდენ ხანს არსებობა. ანონიმურ შეფასების სისტემაში არსებული მიკერძოება და წესების უგულებელყოფა ნამდვილად შემაშფოთებელია.

უკაცრავად, მაგრამ თუ ჩემი სისხლი, ოფლი და ცრემლები ჩავაქსოვე პროექტში, წარვადგინე ოსკარზე, წავედი ამ პრესტიჟულ ცერემონიაზე, წავაგე და ბოლოს გავიგე, რომ გადაწყვეტილების მიმღებმა ხალხმა ჩემი ფილმი არც კი ნახა — ნამდვილად განვრისხდებოდი.