ულტრამემარჯვენე პარტია"ეროვნული გაერთიანების" ლიდერ მარინ ლე პენს პარიზის სასამართლომ 2027 წელს საფრანგეთის საპრეზიდენტო არჩევნებში მონაწილეობა აუკრძალა და 4 წლით თავისუფლების აღკვეთა მიუსაჯა. აქედან 2 წელი პირობითი სასჯელი აქვს, 2 წელი — ელექტროსამაჯური უნდა ატაროს. ამის შესახებ The Guardian წერს.

მათი ცნობით, საფრანგეთის ულტრამემარჯვენე ლიდერს 5 წლით აეკრძალა კენჭისყრა საჯარო თანამდებობაზე. გადაწყვეტილება დაუყოვნებლივ შევიდა ძალაში. ამას გარდა, ლე პენს დაეკისრა 100 000 ევროს ოდენობის ჯარიმა.

ცნობისათვის, ლე პენი და მისი პარტიის 24 წევრი, მათ შორის 9 ყოფილი ევროპარლამენტარი და მათი 12 საპარლამენტო ასისტენტი ფრანგულმა სასამართლომ დამნაშავედ ცნო — მათ ბრალი ედებოდათ ევროპის პარლამენტის მიერ გამოყოფილი საბიუჯეტო თანხების გაფლანგვაში. საპარლამენტო ასისტენტების ნაცვლად, პარტია თანხას თავის თანამშრომლებს უხდიდა საფრანგეთში.