პატრიოტთა ალიანსმა 2017 წლის თვითმმართველობების არჩევნებისთვის ახალქალაქსა და ბორჯომში მერობის კანდიდატებად ნაციონალური მოძრაობისა და ქართული ოცნების ყოფილი წევრები წარადგინა.

ახალქალაქში მერობისთვის სამველ პეტროსიანი იბრძოლებს, რომელიც 2012-2016 წლებში ნაციონალური მოძრაობის მაჟორიტარი დეპუტატი იყო.

გამოცემა სამხრეთის კარიბჭის ცნობით, პეტროსიანი არჩევნებში გამარჯვების შემთხვევაში, ჯავახეთში მცხოვრებ მოსახლეობას ორმაგი მოქალაქეობის მიღებას, ასევე გენოციდის აღიარებასა და ამით, ისტორიული სამართლიანობის აღდგენას ჰპირდება:

"გენოციდის აღიარების საკითხი ჩვენს მიერ პარლამენტში არაერთხელ დაისვა. გამარჯვების შემთხვევაში ვპირდები ამომრჩეველს, რომ ახალქალაქის მუნიციპალიტეტი აღიარებს სომხების გენოციდს. ძირითად ყურადღებას დავუთმობთ ეროვნული უმცირესობების უფლებების დაცვის საკითხს, ჩვენ გავაგრძელებთ გზას სახელმწიფო ენის შესწავლის მიმართულებით, ისევე როგორც დავიცავთ მშობლიურ ენას".

რაც შეეხება ბორჯომს, აქ მერის პოზიციაზე, პატრიოტთა ალიანსის სახელით ზაზა ჩაჩანიძე იყრის კენჭს. ჩაჩანიძე 2014 წლიდან 2017 წლის 29 აგვისტომდე ბორჯომის საკრებულოს ხელმძღვანელობდა და ქართულ ოცნებას წარმოადგენდა. მან თანამდებობა განცხადების საფუძველზე დატოვა.

"ჩემი მთავარი პრიორიტეტი ხალხის გვერდით დგომა და მათი პრობლემის გაზიარება იქნება.გამარჯვების შემთხვევაში, ჩვენ ვიმუშავებთ ბიუჯეტის სწორად დაგეგმარებაზე, რადგან ეს იყო ყოველთვის ბორჯომის პრობლემა. ამისთვის კი საჭიროა მოსახლეობის პრობლემების გათვალისწინება და მთავარი პრიორიტეტებს დასახვა. ჩვენი პროგრამის მიხედვით, ყოველ მესამე შეძენილ შვილზე 6 000 ლარით დახმარება იქნება", - აცხადებს სამხრეთის კარიბჭესთან საუბარში ზაზა ჩაჩანიძე.