როცა ვიღაც უნებართვოდ შენს შეგულებულ სასუსნავს ნთქავს, სხვა გზა არ გრჩება — ტელეფონი უნდა აიღო და დანაშაული პოლიციას შეატყობინო. სწორედ ასე მოიქცა 4 წლის ამერიკელი ბიჭი, მაგრამ დამნაშავე ამჯერად, არც მეტი, არც ნაკლები, დედამისი ყოფილა.

უისკონსინის შტატის ერთ-ერთი პატარა დასახლების პოლიციის დეპარტამენტმა 4 მარტს უჩვეულო ზარი მიიღო. პატარა ბიჭი გაბრაზებული ხმით რეკავდა, ჩემი დედიკო ცუდად მოიქცაო. როცა ოპერატორი დაინტერესდა, თუ რა მოხდა, ბიჭს ახსნით თავი არ შეუწუხებია და ტირილამდე მისულმა ტელეფონში ორჯერ ჩასძახა, მოდით და დედაჩემი დააკავეთო.

ამ დროს საქმეში "დამნაშავე" ჩაერია და შვილს ტელეფონი გამოართვა.

"ტელეფონი აიღო და იძახდა, 911-ში უნდა დავრეკოო, ასე რომ, მის დაჭერას ვცდილობდით", — აუხსნა ქალმა ოპერატორს, — "მისი ნაყინი შევჭამე და ამიტომაც გირეკავთ".

ბიჭი კი არ ნებდებოდა და განაგრძობდა, ვუთხარი, მოვიდნენ და დედაჩემი ციხეში ჩასვან-მეთქი.

პოლიციასაც სხვა რა გზა ჰქონდა, დანაშაულის ადგილზე ეკიპაჟი გაგზავნა. თუმცა, იქ მისულმა პოლიციის ოფიცრებმა აღმოაჩინეს, რომ ბიჭი გაბრაზებული აღარ იყო და აღარც დედის დაპატიმრებას ითხოვდა — მხოლოდ ნაყინიღა უნდოდა. აი, ეს პატარა სურვილი კი მას პოლიციელებმა სულ ადვილად აუსრულეს და მერე ერთად სამახსოვრო ფოტოც გადაიღეს.

ფოტო: Village Of Mount Pleasant Police Department / Facebook