საინფორმაციო სააგენტო Reuters-ის ცნობით, აშშ-ის პრეზიდენტ დონალდ ტრამპის ადმინისტრაცია მინერალების შეთანხმების ხელმოსაწერად ემზადება. გამოცემა სიტუაციასთან შემხებლობაში მყოფ ოთხ წყაროს ეყრდნობა.

Reuters-ის ინფორმაციით, პრეზიდენტმა ტრამპმა მრჩეველებს განუცხადა, რომ შეთანხმებაზე ხელმოწერის შესახებ ახალი ამბის გამოცხადება დღეს სურს, როცა კონგრესს მიმართავს.

საკითხთან დაკავშირებით თეთრი სახლი კომენტარს ჯერჯერობით არ აკეთებს. დუმს უკრაინის პრეზიდენტის ადმინისტრაცია და ვაშინგტონში უკრაინის საელჩოც.

შეთანხმებისათვის ხელი ლიდერებს 28 თებერვალს უნდა მოეწერათ, თუმცა თეთრი სახლის ოვალურ კაბინეტში შეხვედრა სკანდალურად, ტრამპისა და ზელენსკის ცხარე კამათით დასრულდა.

დღეს ვოლოდიმირ ზელენსკიმ სინანული გამოთქვა 28 თებერვლის ინციდენტთან დაკავშირებით, ამერიკელ ხალხს მადლობა გადაუხადა და განაცხადა, რომ უკრაინა მზადაა, დონალდ ტრამპის ხელმძღვანელობით მშვიდობის დასამყარებლად იმუშაოს.