უზბეკეთში მყოფი ოცნების პრემიერი ირაკლი კობახიძე გერმანიის საგარეო უწყების განცხადებას, სადაც მზია ამაღლობელის გათავისუფლებასა და მის მხარდაჭერაზეა საუბარი, ქართული მართლმსაჯულების დამოუკიდებლობაში უხეშ ჩარევად აფასებს.

"ეს არის ღია და უხეში ჩარევა ქართულ მართლმსაჯულების დამოუკიდებლობაში. მანამდე პირდაპირ და უხეშად ერეოდნენ ჩვენს არჩევნები. ესენი იყვნენ გერმანელი პოლიტიკოსები, ევროკავშირის ელჩი და ა.შ. ახლა პირდაპირ და უხეშად ერევიან მართლმსაჯულების დამოუკიდებლობაში. ეს არის აბსოლუტურად მიუღებელი. მით უმეტეს რომ გერმანია ყოველთვის იყო ცნობილი განსაკუთრებული პატივისცემით სამართლის უზენაესობის მიმართ. ეს არის ის სახელმწიფო, სადაც განსაკუთრებით განვითარდა სამართლებრივი სახელმწიფოს იდეა და დღეს ეს იდეა თავიდან ბოლომდე ფეხქვეშაა გათელილი გერმანელი ბიუროკრატების მიერ.

გერმანიას უბრალოდ ვეღარ ვცნობთ. აბსოლუტურად შეუძლებელია გერმანიის ცნობა. ეს არის ჩემთვის ძალიან დასანანი მოვლენა. გამომდინარე იქიდან, რომ მე მაქვს პირადად იურიდიული განათლება მიღებული გერმანიაში და იქ როცა ვსწავლობდი, სულ რაღაც 20 წლის წინ, სრულიად სხვა რამეს მასწავლიდნენ და დღეს სრულად სხვაგვარად მოქმედებენ გერმანელი ბიუროკრატები.

თუ ახალი კანცლერი იქნება დამოუკიდებელი "დიფ სთეითის" გავლენებისგან, გლობალური ომის პარტიის გალენებისგან, ამ შემთხვევაში ცვლილები იქნება. თუმცა ჩვენ წინასწარ გაგვიჭირდება ამას თქმა, როგორ განვითარდება მოვლენები. თქვენ ხედავთ სადამდე შეიძლება მიიყვანს კონკრეტული ქვეყნების გლობალურმა ომის პარტიამ", — განაცხადა კობახიძემ.

შეგახსენებთ, მზია ამაღლობელის სასამართლო პროცესამდე ერთი დღით ადრე, 3 მარტს, გერმანიის საგარეო საქმეთა სამინისტრომ X-ზე მხარდაჭერა გამოუცხადა ნეტგაზეთის და ბათუმელების დამფუძნებელ მზია ამაღლობელს და ქართულ ოცნებას მისი დაუყოვნებლივ გათავისუფლებისკენ მოუწოდებს.

"ქართული ოცნება ჟურნალისტების, დემონსტრანტებისა და ოპოზიციის წინააღმდეგ დაშინების კამპანიას აგრძელებს. ჩვენ მხარს ვუჭერთ მათ, ვინც თავისუფლებას იცავს", — ვკითხულობთ სამინისტროს პოსტში.