26 თებერვალს ხელვაჩაურის მუნიციპალიტეტში, სოფელ ორთაბათუმში სახლი დაიწვა. ბათუმელებთან საუბრისას მოქალაქე უშანგი მაჭუტაძე ამბობს, რომ სახანძრო უგზოობის გამო ვერ მივიდა ადგილზე და ღია ცის ქვეშ დარჩნენ.

"სახლი დაგვეწვა, გზა არ იყო, რომ სახანძრო მოსულიყო, ღია ცის ქვეშ დავრჩით", – ამბობს უშანგი მაჭუტაძე.

ბათუმელების ცნობით, სოფელ ორთაბათუმში გზა დღესაც არაა გაწმენდილი.

"სავარაუდოდ დენის სადენებს გაუჩნდა ცეცხლი, ძლივს მოვასწარით სახლიდან გამოსვლა, ვერაფრის გადარჩენა ვერ მოვასწარით.

შვიდსულიანი ოჯახი ვართ, 2 პატარა ბავშვი გვყავს, ბაბუა 88 წლის… არავინ არ მოსულა, არ უკითხავს ჩვენი ამბავი, არც მერიიდან მოსულა ვინმე. მოვიდნენ მაშველები და მოგვეხმარნენ, მაგრამ სახანძრო ვერ ამოვიდა. თოვლი ახლაც მეტრ-ნახევარია ყველაზე ცოტა.

ბიძაშვილს შევაფარეთ თავი, ყველაფერი გვჭირდება: ტანსაცმელი, საჭმელი…," – ამბობს უშანგი მაჭუტაძე.