საქართველოს შინაგან საქმეთა სამინისტრო ისრაელში ბაზირებული კომპანია Cellebrite-სგან 6 796 092 ლარად პროგრამული უზრუნველყოფების პაკეტებს შეიძენს, რომელთა მეშვეობითაც მობილურ ტელეფონებში, პერსონალურ კომპიუტერებსა და სხვა ციფრულ მოწყობილობებში განთავსებული ინფორმაციის წაკითხვაა შესაძლებელი.

აღსანიშნავია, რომ შსს-ს მსგავსი მომსახურება სახელმწიფო შესყიდვის ფარგლებში აქამდეც შეუძენია, თუმცა 6 796 092 ლარი ამ მიმართულებით დახარჯული რეკორდული თანხაა.

დოკუმენტაციის თანახმად, კომპანია Cellebrite-ს მომსახურებას საქართველოში შპს "ქომუნალ ტექნოლოჯი" უწევს.

აღსანიშნავია, რომ შინაგან საქმეთა სამინისტრომ მიმდინარე წლის 13 თებერვალს Cellebrite-გან წერილი მიიღო, რომელშიც კომპანიის შესყიდვების მენეჯერი, ალბერტ კაცირი წერს, რომ საქართველო ერთადერთი ქვეყანაა კავკასიის რეგიონში, რომელსაც კომპანიის სერვისებზე აქვს წვდომა, თუმცა მისივე თქმით, ეს შეიძლება შეიცვალოს და საქართველომ ვეღარ შეისყიდოს აღნიშნული სერვისები.