პაპი ფრანცისკე 21 აპრილს, დილით გარდაიცვალა. ინფორმაციას ვატიკანის ოფიციალური წარმომადგენლები ავრცელებენ.

კათოლიკური ეკლესიის სულიერი წინამძღოლი, პაპი ფრანცისკე 88 წლის იყო. პონტიფის პოზიციაზე კონკლავმა ის 2013 წელს აირჩია პაპი ბენედიქტე მე-16-ეს ისტორიული გადადგომის შემდეგ. ფრანცისკე, ერისკაცობაში ხორხე მარიო ბერგოლიო, რომის 266-ე და პირველი ლათინოამერიკელი (არგენტინელი) პაპი იყო.

ტრადიციის მიხედვით, დღეიდან კათოლიკურ სამყაროში 9-დღიანი გლოვის პერიოდი დაიწყება. ეროვნული გლოვა გამოცხადდა იტალიაშიც. მომდევნო რამდენიმე დღის განმავლობაში პაპის ცხედარი ვატიკანის წმინდა პეტრეს ბაზილიკაში იქნება დასვენებული, სადაც კათოლიკე ქრისტიანებს მოლოცვისა და მისთვის პატივის უკანასკნელად მიგების შესაძლებლობა ექნებათ.

ახალი პაპის არჩევამდე ვატიკანი sede vacante-ს, ანუ "თავისუფალი სკამის" რეჟიმში იმუშავებს. ინსტიტუციის ოფიციალურ გადაწყვეტილებებს კარდინალთა კოლეგია მიიღებს, ჯგუფი, რომლებიც ახალი პაპის არჩევაზეა პასუხისმგებელი.

ტრადიციულად, პაპებს წმინდა პეტრეს ტაძრის ქვემოთ მდებარე აკლდამებში კრძალავენ, თუმცა პაპმა ფრანცისკემ 2022 წელს აღნიშნა, რომ სამუდამო განსასვენებელი უკვე შერჩეული აქვს და ეს რომში მდებარე წმინდა მარიამის ბაზილიკაა. ჯერჯერობით უცნობია, პაპს ტრადიციის მიხედვით ვატიკანში დაკრძალავენ თუ იქ, სადაც თავად სურდა.

ფრანცისკეს პაპობის პერიოდი გამოირჩეოდა ეკლესიის მიერ სოციალურ სამართლიანობაზე, გარემოს დაცვასა და ინკლუზიურობაზე განსაკუთრებული ზრუნვით. ფრანცისკე კათოლიკური ეკლესიის გათანამედროვებაზე ზრუნავდა, განსაკუთრებით კი ისეთი მარგინალიზებული ჯგუფების განუსჯელად მიღებაზე, როგორებიც არიან ემიგრანტები და LGBTQ+ თემის წარმომადგენლები.