Washington Post-ის ცნობით, დონალდ ტრამპის ადმინისტრაციამ გაეროში უკრაინას რუსეთის აგრესიის დამგმობი რეზოლუციის გაწვევა და მის ნაცვლად აშშ-ის რეზოლუციის მხარდაჭერა მოსთხოვა. ვაშინგტონის რეზოლუცია კიევში პრორუსულად მიიჩნევა.

მედიასაშუალება დიპლომატიურ წყაროებზე დაყრდნობით წერს, რომ შეთავაზებამ კიევში დაბნეულობა გამოიწვია და უკრაინულმა მხარემ საკუთარი რეზოლუციის გაწვევაზე უარი თქვა.

აშშ-ის სახელმწიფო მდივნის, მარკო რუბიოს განცხადებით, აშშ-ის "მარტივი და ისტორიული" რეზოლუცია ომის საშინელებას და მის მსხვერპლს ეხება — რეზოლუციაში ნახსენები არ არის რუსეთის მიერ ოკუპირებული ტერიტორიები და არც აგრესორის როლია გამოკვეთილი ამ ომის დაწყებაში.

"პრეზიდენტ ტრამპს რუსეთ-უკრაინის ომის დასრულება მტკიცედ აქვს გადაწყვეტილი და მზად არის გადაწყვეტისთვის, რომელიც ხანგრძლივ მშვიდობას გამოიწვევს და არა დროებით პაუზას. ორშაბათს, 24 თებერვალს, რუსეთ-უკრაინის ომის დაწყებიდან სამი წელი გადის. ეს ომი დიდხანს და რუსეთისა და უკრაინისთვის საშინელ ფასად გაგრძელდა", — განაცხადა მარკო რუბიომ.

რუბიოს მიერ ნახსენებ რეზოლუციას კიევში ხედავენ, როგორც მცდელობას, შემსუბუქდეს რუსეთის პასუხისმგებლობა სამხედრო აგრესიაზე — განსაკუთრებით მას შემდეგ, რაც დონალდ ტრამპმა ომის "ვერ არიდებაში" უკრაინა დაადანაშაულა.

ასევე იხილეთ: უკრაინის ომის დაწყების მესამე წლისთავთან დაკავშირებით, გაერო 2 განსხვავებულ რეზოლუციას განიხილავს

Washington Post-ის წყაროს ცნობით, აშშ-მ უკრაინელებისგან დოკუმენტის გადაკეთება და მისი "შერბილება" მოითხოვა, შემდეგ კი საკუთარი რედაქციაც წარმოადგინა, თუმცა კიევისგან ორივე შემთხვევაში უარი მიიღო.