უკრაინული მედიის ცნობით, გერმანიის კანცლერი, ოლაფ შოლცი გამორიცხავს უკრაინაში ომის დასრულებასთან დაკავშირებით აშშ-ისა და რუსეთის მოლაპარაკებებს უკრაინისა და ევროპის ჩართულობის გარეშე.

გერმანული გამოცემა n-tv-ის ეთერში შოლცმა განაცხადა, რომ ევროპა არ დაუშვებს ასეთ სცენარს, რადგან აქვს უფლება, კონტინენტის უსაფრთხოების საკითხზე ხმამაღლა ისაუბროს. გერმანიის კანცლერის თქმით, არ შეიძლება უსაფრთხოების გარანტიები არსებობდეს ევროპელების გარეშე, ან უკრაინელების ინტერესების გაწირვის ხარჯზე.

"ჩვენ, როგორც ევროპელები, ამას არ დავუშვებთ. ასევე, არავის მივცემთ უფლებას, უკრაინის დემილიტარიზაციას დასთანხმდნენ", — განაცხადა ოლაფ შოლცმა.

შეგახსენებთ, აშშ-ის ახალი პრეზიდენტის ადმინისტრაცია აქტიურ მოლაპარაკებებს აწარმოებს რუსეთთან უკრაინაში სამშვიდობო შეთანხმების მისაღწევად, თუმცა ტრამპის სპეციალური წარმომადგენლის, კიტ კელოგის განცხადებით, მოლაპარაკებების მაგიდასთან ევროპა არ იქნება წარმოდგენილი.