მოქალაქეებს, რომლებიც ოცნების ქალაქში დაღუპული ბავშვების ოჯახების მხარდასაჭერად შეიკრიბნენ კვერცხები და ხილი – მანდარინი, ფორთოხალი და ა.შ. საცხოვრებელი კორპუსის ფანჯრიდან ნასროლი ნივთები მოქალაქეებს თავში მოხვდათ. ბევრი მათგანი აქციაზე მცირეწლოვან ბავშვებთან ერთად იყო მოსული.

აქციის მონაწილეებმა გამოიძახეს პოლიცია. ისინი სამართალდამცველებისგან დროულ და ეფექტიან რეაგირებას ითხოვებ. თუმცა, მათი ნაწილი წუხს, რომ პოლიცია აჭიანურებს რეაგირებას.

“იმ ბავშვებს ესროლეს ეს ყველაფერი” — ისმის შეძახილები ადგილიდან.

მოქალაქეები ეკონომიკის სამინისტროსთან დაახლოებით ორი საათის წინ შეიკრიბნენ. ისინი ბავშვების გარდაცვალებაზე პასუხისმგებლობას სახელმწიფოს აკისრებენ და მოითხოვენ, დაისაჯონ მომხდარში დამნაშავე პირები.

აქციის დასრულების შემდეგ ისინი მარშით გაემართნენ რუსთაველის გამზირზე, პარლამენტის შენობისკენ. სწორედ ამ დროს, კულტურის სამინისტროსთან ახლოს, საცხოვრებელი კორპუსიდან მათ ფანჯრიდან ესროლეს კვერცხები და ხილი.

შეგახსენებთ, 15 თებერვალს ბათუმში, ოცნების ქალაქის ტერიტორიაზე, ორი მცირეწლოვანი ბავშვი თხრილში ჩავარდა და დაიღუპა. პირველადი ცნობებით, ბავშვები იმ ტერიტორიაზე ჩავარდნენ ორმოში, სადაც სამშენებლო სამუშაოები მიმდინარეობს და მათ რამდენიმე საათის განმავლობაში ეძებდნენ. ქართული ოცნების წარმომადგენლები და სამშენებლო კომპანია ანაგი უარყოფენ იმ ფაქტს, რომ ტრაგედია სამშენებლო სამუშაოების ტერიტორიაზე მოხდა.

შს სამინისტროს ცნობით, გამოძიება დაწყებულია სისხლის სამართლის 116-ე მუხლით – სიცოცხლის მოსპობა გაუფრთხილებლობით [ისჯება შინაპატიმრობით, ვადით ექვსი თვიდან ორ წლამდე ან თავისუფლების აღკვეთით ვადით ორიდან ოთხ წლამდე. იგივე ქმედება, ჩადენილი ორი ან მეტი პირის მიმართ, – ისჯება თავისუფლების აღკვეთით ვადით სამიდან ხუთ წლამდე].