აშშ-ს პრეზიდენტმა დონალდ ტრამპმა განაცხადა, რომ მიმდინარე წლიდან აშშ ინდოეთს უფრო მეტ სამხედრო აღჭურვილობას მიჰყიდის, მათ შორის, F-35-ის ტიპის ავიაგამანადგურებლებსაც.

"ჩვენ მილიარდობით დოლარით გავზრდით სამხედრო [აღჭურვილობის] გაყიდვებს ინდოეთში. ჩვენ ასევე მივიწევთ წინ, რომ საბოლოოდ ინდოეთი F-35 ავიაგამანადგურებლებით მოვამარაგოთ", — განაცხადა ტრამპმა.

ტრამპმა არ წარმოადგინა ვადები, მაგრამ უცხოური სამხედრო გაყიდვები, განსაკუთრებით უახლესი ტექნოლოგიებისთვის, როგორიცაა ფარული F-35 თვითმფრინავი, ჩვეულებრივ მუშაობას წლები სჭირდება.

ინდოეთის პრემიერმინისტრ, ნარენდრა მოდისა და ამერიკის პრეზიდენტის შეხვედრის შემდეგ, ტრამპმა პრესკონფერენციაზე ასევე განაცხადა, რომ ქვეყნებმა მიაღწიეს შეთანხმებას, რომლის მიხედვითაც ინდოეთი აშშ-სგან მეტ ნავთობსა და ბუნებრივ აირს შეისყიდის იმ მიზნით, რომ ქვეყნებს შორის არსებული სავაჭრო დეფიციტი შემცირდეს.

ტრამპის თქმით, ვაშინგტონი და ნიუ-დელი ითანამშრომლებენ და "რადიკალური ისლამური ტერორიზმის საფრთხეს" ერთობლივი ძალისხმევით შეეცდებიან, ებრძოლონ.

ინდოეთის საგარეო საქმეთა მინისტრმა ვიკრამ მისრიმ მოგვიანებით ჟურნალისტებს განუცხადა, რომ ნიუ-დელი სამხედრო აღჭურვილობის უცხოეთიდან შესყიდვის პროცესშია. მაგრამ, მისრის აზრით ინდოეთს ჯერ არ დაუწყია მოწინავე საავიაციო პლატფორმის შეძენა და ტრამპის განცხადება F-35-ზე "ჯერჯერობით მხოლოდ წინადადების დონეზეა".

შეგახსენებთ, 2008 წლიდან ინდოეთს 20 მილიარდი დოლარის ღირებულების ამერიკული თავდაცვის პროდუქტები აქვს შეძენილი.

აშშ-ს კონგრესში არსებული კვლევითი ცენტრის მონაცემებით, ნიუ-დელი გეგმავს, რომ შემდეგი ათწლეულის განმავლობაში არმიის მოდერნიზებისთვის 200 მილიარდ დოლარზე მეტი დახარჯოს.

მსოფლიოში შეიარაღების ყველაზე მსხვილი იმპორტიორის, ინდოეთის მთავარი სამხედრო მომმარაგებელი ათწლეულების მანძილზე რუსეთი იყო. დღემდე, რუსული ავიაგამანადგურებლები ინდოეთის საჰაერო თავდაცვის ძალების რიგებშია. თუმცა, ბოლო წლებში, განსაკუთრებით 2022 წელს უკრაინის წინააღმდეგ დაწყებული სრულმასშტაბიანი ომის გამო, რუსეთმა სხვა ქვეყნებში სამხედრო პროდუქტების ექსპორტი შეამცირა, რამაც ინდოეთი აიძულა, დასავლეთისკენ მიბრუნებულიყო.

ამისდა მიუხედავად, რუსი და ინდოელი მაღალჩინოსნების მიერ ცოტა ხნის წინ გაკეთებული განცხადების თანახმად, რუსეთმა ინდოეთს Sukhoi Su-57-ის ტიპის მეხუთე თაობის ავიაგამანადგურებლები შესთავაზა, ვინაიდან მოსკოვი ნიუ-დელისთან ძლიერი კავშირების შენარჩუნებას ცდილობს.