ჰააგის სისხლის სამართლის საერთაშორისო სასამართლოს (ICC) პროკურორი, ბრიტანელი კარიმ ხანი პირველი ადამიანია, ვინც დონალდ ტრამპმა ეკონომიკური და სამგზავრო სანქციებით დასაჯა სასამართლოს წინააღმდეგ დაწყებული გამოძიების ფარგლებში.

7 თებერვალს აშშ-ის პრეზიდენტმა ხელი მოაწერა აღმასრულებელ ბრძანებას, რომლითაც საკუთრივ ჰააგის სასამართლო დაასანქცირა. აღმასრულებელ ბრძანებაში აღნიშნულია, რომ სანქციის მიზეზი სასამართლოს მიერ განხორციელებული არალეგიტიმურ და უსაფუძვლო ქმედებებია, რომელთა სამიზნეც შეერთებული შტატები და მისი მოკავშირე ისრაელია.

სანქციები ითვალისწინებს ფინანსური და სავიზო შეზღუდვების დაწესებას იმ პირებსა და მათ ოჯახებზე, რომლებიც ხელს უწყობენ სისხლის სამართლის საერთაშორისო სასამართლოს გამოძიებას ამერიკის შეერთებული შტატების მოქალაქეების ან მოკავშირეების წინააღმდეგ.

ICC-მა ტრამპის საქციელი დაგმო და განაცხადა, რომ სასამართლო თავისი თანამშრომლების გვერდით დგას და გააგრძელებს "მსოფლიოში ომის დანაშაულების მილიონობით უდანაშაულო მსხვერპლთათვის სამართლიანობისა და იმედის მისაცემად ბრძოლას".