აშშ-ის ახალმა ადმინისტრაციამ USAID-ის შემდეგ, დაფინანსება მეორე უდიდეს ორგანიზაციას, დემოკრატიის ეროვნულ ფონდსაც (NED) შეუჩერა.

იმაზე, რაც ახლა NED-ში ხდება, ამერიკული მედია აქტიურად საუბრობს. NED მსოფლიოს მასშტაბით ერთ დროოს განმათავისუფლებელი მოძრაობების უდიდესი მხარდამჭერი იყო და ამჟამად, წელიწადში, USAID-თან შედარებით მოკრძალებულ 315 მილიონ დოლარს იღებდა — ილონ მასკის მიერ კონტროლირებადმა მთავრობის ეფექტიანობის დეპარტამენტმა (DOGE) კი ეს დაფინანსება გაყინა და ახლა ორგანიზაცია ძალიან რთულ მდგომარეობაშია.

თანამშრომლების თქმით, NED-ს ახლა სულ მცირე დამატებითი ხარჯების გაწევაც აღარ შეუძლია. დემოკრატიის ეროვნული ფონდის დაშლა არ ნიშნავს მხოლოდ ხარჯების შემცირებას — ეს აშშ-ის საგარეო პოლიტიკის ცვლილების ცხადი მაგალითი იქნება — ამერიკული მედია წერს, რომ ორგანიზაციის ამ მდგომარეობამდე მიყვანა ნიშნავს, რომ აშშ აღარ არის დაინტერესებული მსოფლიოში დემოკრატიის გავრცელებით.

NED 1983 წელს, პრეზიდენტ რონალდ რეიგანის ჩართულობით, როგორც რესპუბლიკური, ისე დემოკრატიული პარტიების ურთიერთშეთანხმებით ჩამოყალიბდა საბჭოთა "ბოროტების იმპერიასთან" საბრძოლველად და ცივი ომის მიწურულს მნიშვნელოვან დახმარებას უწევდა სოციალისტურ ბლოკში მოქმედ განმათავისუფლებელ მოძრაობებს. ორგანიზაციის ყოფილი პრეზიდენტის ცნობით, სწორედ ისინი აწვდიდნენ საბეჭდ მანქანებსა და რადიოებს ლეხ ვალენსას "სოლიდარობის" მოძრაობას სოციალისტურ პოლონეთში.