საქართველოს მეხუთე პრეზიდენტი, სალომე ზურაბიშვილი, რუსთაველის გამზირზე მიმდინარე უწყვეტ პროევროპულ პროტესტზე დაკავებულთა ოჯახის წევრებს ხვდება.

შეხვედრას ესწრებიან ანდრო ჭიჭინაძის, საბა სხვიტარიძისა და სხვა პოლიტიკური ნიშნით დაკავებულ მომიტინგეთა მშობლები.

შეხვედრის დაწყებამდე საბა სხვიტარიძის დედამ, ელენე ახობაძემ კომენტარი გააკეთა მისი შვილის მიერ გუშინ გაკეთებულ მძიმე განცხადებასთან, რომლის თანახმადაც ის სამართალდამცავების მხრიდან წამებისა და არაადამიანური მოპყრობის მსხვერპლი გახდა. ელენე ახობაძის თქმით, წარმატებაში სალომე ზურაბიშვილს დიდი როლი აქვს.

"ძალიან მინდა, რომ გავიდეს ეს ინფორმაცია, რაც გუშინ საბამ თავისი წამების შესახებ მოყვა. უმძიმესი რამ მოვისმინეთ და ჩემთვის პირადად დამანგრეველი იყო. ამ ფაქტმა წამაქცია გუშინ, მაგრამ მაინც მხნედ ვიქნები ამათ ჯინაზე, მაინც კარგად ვიქნები. აუცილებლად აგებს სულ ყველა პასუხს კანონის წინაშე, ეს გარდაუვალია. რა თქმა უნდა, ისევ თქვენი, ქალბატონი სალომე ზურაბიშვილისა და სრულად საქართველოს დახმარებით, ვინც ასე გვიდგას გვერდით. ჩვენი შვილებიც იბრძვიან ჩვენი კარგი მომავლისთვის. აუცილებლად მივაღწევთ წარმატებას და ამაში სალომე ზურაბიშვილს ძალიან დიდი წვლილი მიუძღვის. ცეცხლი ოლიგარქიას!", — განაცხადა ელენე ახობაძემ.

სალომე ზურაბიშვილის როლზე ისაუბრა დაკავებული მსახიობის, ანდრო ჭიჭინაძის დედამაც. ლიკა გუნცაძის თქმით, საქართველოს სამე-5 პრეზიდენტი მათ გვერდით დგას და ისინიც სალომე ზურაბიშვილის გვერდით დგომას გააგრძელებენ.

"ჩვენი პრეზიდენტის, სალომე ზურაბიშვილის როლი ძალიან დიდია ქვეყნის შიგნითაც და მის გარეთაც. მისი ძალიან დიდი იმედი გვაქვს. ძალიან ბევრს მუშაობს ქვეყნისთვის, ახალი არჩევნებისთვის და რაც მთავარია, პოლიტპატიმრებისთვის. ის ჩვენ გვიდგას გვერდით და ჩვენ მას დავუდგებით. როდესაც ჩვენ ელჩებს შევხვდით, ძალიან კარგი შეხვედრა შედგა, ყველა ძალიან გულმოდგინედ გვისმენდა. მათ თვალებშიც კი შევატყვე თანადგომა და შეწუხება. ერთადერთი იტალიის ელჩს მივმართე მწვავე კითხვებით: ცხოვრობს თუ არა ის საქართველოში, უყურებს თუ არა რა ხდება გარშემო. არალეგიტიმური მთავრობის საგარეო საქმეთა მინისტრთან ჩახუტებული ფოტო, ჩემთვის და ყველა მშობლისთვისაც ამორალური იყო. ეს ყველაფერი პირადად ვუთხარი. დანარჩენი ელჩები მართლაც ძალიან შეწუხებულები იყვნენ. მგონი, ამ შეხვედრამ გამოიღო რაღაც შედეგი. დარწმუნებული ვარ ჩვენი პრეზიდენტი ყველაფერს გააკეთებს ამისთვის. ძალიან მჯერა და მიუნხენში აუცილებლად გაჟღერდება მწვავედ", — აღნიშნა ლიკა გუნცაძემ.