"ადამიანებს არ აქვთ აღქმა, რომ ეს არის მათი პოლიცია. ხალხი უკვე მათ უყურებს, როგორც ჩვეულებრივ ზონდერ-დაჯგუფებას", — ამის შესახებ გახარია საქართველოსთვის წევრმა ლევან გოგიჩაიშვილმა თბილისის საქალაქო სასამართლოში ჟურნალისტებთან განაცხადა. მისი თქმით, პოლიციას პატივს აღარავინ სცემს.

"ხალხს პოლიციის არ ეშინია. მათ უნდა იცოდნენ, ადამიანებს არ აქვთ აღქმა, რომ ეს არის მათი პოლიცია. ხალხი უკვე მათ უყურებს, როგორც ჩვეულებრივ ზონდერ-დაჯგუფებას, რომელსაც რატომღაც სახელმწიფოს გადასახადიდან შეძენილი ფორმა აცვია, კანონის, პროტოკოლის ქვეშ არიან, მაგრამ საზოგადოების დამოკიდებულება მათ მიმართ, სამწუხაროდ, არის ძალიან შეცვლილი - პოლიციას პატივს არავინ აღარ სცემს, პოლიციას უყურებენ, როგორც პრობლემას", — განაცხადა ლევან გოგიჩაიშვილმა.

ლევან გოგიჩაიშვილმა 10 თებერვალს რუსთაველზე მის დაკავებაზეც ისაუბრა, მისი თქმით, მასთან აგრესიულად მივიდა ერთი პოლიციელი, რომელმაც რაღაც უთხრა, რომელსაც პასუხი გასცა და შემდეგ იმ პოლიციელმა თანამშრომლებს მისი დაკავების მითითება მისცა.

გოგიჩაიშვილი აცხადებს, რომ საპატრულო პოლიციის დეპარტამენტის დირექტორის მოადგილე სერგო ბზიშვილი "ბიძინა ივანიშვილის ხელისუფლების ჩვეულებრივი ბანდის წევრია და მისი ყეყეჩობის ადგილი ამ ქვეყანაში არასდროს იქნება".

"თვითონ იმის გამბედაობაც არ ეყო, რომ თავად მოსულიყო და ხელქვეითებს დაავალა ეს ამბავი (დაკავება). ეს პოლიციელი მე მგონი, სერგო ბზიშვილია. არ ვიცი, მას, რა თანამდებობა აქვს, მაგრამ მომავალში პრობლემები რომ ექნება, მაგის გარანტიას მე ვაძლევ, როგორც ადამიანურს, ისე სამართლებრივს იმიტომ, რომ ასეთის ადგილი პოლიციაში არ არის. ეს არ არის პოლიციელი, ჩემთვის ეს ადამიანი პოლიციელი არ არის. ბიძინა ივანიშვილის ხელისუფლების ჩვეულებრივი ბანდის წევრია. ბანდის წევრია, ჩაცმულად რაღაცნაირი იყო, მოხულიგნოა, ვულგარულია, უზრდელია. რა თქმა უნდა, პასუხი მიიღო იქვე და უნდა იცოდეს სერგო ბზიშვილმა, რომ მისი ყეყეჩობის ადგილი ამ ქვეყანაში არასდროს იქნება. ის, როგორც ჩანს, არის პოლიციის ერთ-ერთი და აქტიური ზონდერი, მე მას, როგორც პოლიციელს ისე არ მოვიხსენიებ, ის არ არის პოლიციელი, ის არ არის პოლიციელის მუნდირის ღირსი. როგორც ზონდერებს ემართებათ ხოლმე, როდესაც ის ხელისუფლება და სისტემა, რაზეც ისინი დგანან, ჩამოიშლება და მერე რა დღეშიც ვარდებიან ზუსტად ანალოგიურ სიტუაციაში იქნება ბატონი სერგო. ძალიან მძიმე მდგომარეობა ექნება. მან უნდა იცოდეს, რომ არაფრის გატარება არ მოხდება, განსაკუთრებით ასეთი მშიშარების იმიტომ, რომ გამბედაობა მაინც ჰქონოდა, თვითონ მიეღო ამ პროცესში მონაწილეობა, რაღაც დაიძახა და გაიქცა, მშიშარა — საქმეც იმაშია,რომ (პოლიციელებს) აგრესია აქვთ, ყვირიან "დაგაკავებ". სერგო ბზიშვილის ვის უნდა ეშინოდეს. ალბათ, რომ იღვიძებს და სარკეში იყურება, საკუთარი თავის, საკუთარი ლანდის შეიძლება ეშინოდეს. ამიტომ, სერგო ბზიშვილის შესაშინებელი ამ ქვეყანაში არავის არაფერი აქვს", — განაცხადა ლევან გოგიჩაიშვილმა.