ქუთაისში, მოსამართლის სახლთან 30-წუთიანი საპროტესტო შეკრების გამო, ქუთაისის საქალაქო სასამართლოში 9 პირის ადმინისტრაციული სამართალდარღვევის საქმეზე პროცესი ცოტა ხნის წინ დასრულდა. მოსამართლე ციცინო მოსიძემ მაია ცირამუა, ნინო ქათამაძე, გელა მთივლიშვილი, ვლადიმერ აფხაზავა, ხვიჩა ვაშაყმაძე, ირინა ზარანდია, ქეთევან ფილაური, ეკა კუხალაშვილი და გივი ცინცაძე 5-5 ათასი ლარით დააჯარიმა.

2025 წლის 7 თებერვალს, აღნიშნულ პირებს მზია ამაღლობელის უკანონო პატიმრობასთან დაკავშირებით, ქუთაისში, მოსამართლის სახლთან 30-წუთიანი საპროტესტო შეკრების გამო, შინაგან საქმეთა სამინისტრომ ადმინისტრაციული სამართალდარღვევის ოქმი შეუდგინა.

აქციის მონაწილეებმა 2025 წლის 26 იანვარს მოსამართლე მალხაზ ოქროპირაშვილის სახლთან სოლიდარობის სიმბოლური აქტით გააპროტესტეს მზია ამაღლობელის უკანონო პატიმრობა. მალხაზ ოქროპირაშვილი მოსამართლეა, რომელმაც არ განიხილა მზია ამაღლობელის სააპელაციო სარჩელი აღმკვეთი ღონისძიების სახით პატიმრობის გამოყენებასთან დაკავშირებით.