10 თებერვალს, თბილისის საქალაქო სასამართლომ, ჯგუფ დაიტოვეს წევრი, ნენსი ვოლანდი, რუსთაველზე გზის გადაკეტვისთვის 5000 ლარით დააჯარიმა. მას ადმინისტრაციულ სამართალდარღვევათა კოდექსის 174 პრიმა მუხლის მე-4 ნაწილის დარღვევას ედავებოდნენ, კერძოდ, 26 იანვარს საპროტესტო აქციაზე გზის გადაკეტვას.

აქტივისტი აღნიშნავს, რომ როდესაც ის რუსთაველზე მივიდა, გზა უკვე გადაკეტილი იყო. ნენსი ვოლანდის თქმით, ის პოლიციას არ გაუფრთხილებია, რომ კანონს არღვევდა და უწყების მოვალეობაა აქტივისტს გზის გადაკეტვისთვის არასაკმარისი ხალხის რაოდენობაზე გააფრთხილოს.

"უკვე გადაკეტილ რუსთაველზე მივედი. კადრია, სადაც ვდგავარ და ინტერვიუს ვაძლევ ვიღაცას. ვუთხარი, რომ არავის ჩემთვის არ უთქვამს, რომ მე კანონს ვარღვევ — აუცილებელია, რომ გამაფრთხილოს პოლიციელმა, რომ კანონს ვარღვევ. მე ჩემით არ შემიძლია შევაფასო, არის თუ არა იმ დროს საკმარისი რაოდენობა, ეს არის უწყების მოვალეობა. კადრებში ჩანს, რომ მარში როცა შემოუერთდა გზას, შემდეგ პოლიცია გადავიდა გზაზე და გადაკეტა სავალი ნაწილი," — განაცხადა აქტივისტმა.

ნენსი ვოლანდმა განაცხადა, რომ ის გადაწყვეტილებას გაასაჩივრებს, მას შემდეგ რაც შესაბამისი დოკუმენტები ჩაბარდება.