ახალი ფუნქციით, მომხმარებლებს შეეძლებათ ანონიმურად შეატყობინონ ფეისბუქს, თუ ჩათვლიან, რომ მათი მეგობრის რომელიმე პოსტი სუიციდური ნიშნების მაჩვენებელია.

ინტერნეტში საკუთარი ცხოვრების ბედნიერად წარმოჩენა ჩვეულებრივი მოვლენაა, თუმცა ხშირად, მათთვის რთულ დროს, ადამიანები წუხილის და ტკივილის ამოსათქმელად სწორედ სოციალურ ქსელებს მიმართავენ. ასეთ დროს, მხარდაჭერის ანონიმურად გამოხატვა და ტრაგედიის თავიდან აცილება, ამ ახალი ფუნქციით იქნება შესაძლებელი.

"სუიციდის პრევენციის ფუნქცია" დარღვევის შეტყობინების ფუნქციის მსგავსად მუშაობს. პოსტის მონიშვნის შემდეგ, მისი ავტორი ფეისბუქისგან შეტყობინებას მიიღებს, სადაც ემოციურად რთულ პერიოდში, დახმარების სხვადასხვა ვარიანტი იქნება ნაჩვენები.

ფოტო: Facebook

"ოკსანა, რამით ხომ ვერ დაგეხმარებით?" — ვკითხულობთ ფეისბუქის მიერ გავრცელებულ სურათზე, რომელიც ასეთი შეტყობინების მაგალითია. "ვიღაცამ ნახა თქვენი პოსტი და იფიქრა, რომ შესაძლოა, ცუდი პერიოდი გაქვთ. თუ მხარდაჭერა გჭირდებათ, ჩვენ აქ ვართ და დაგეხმარებით".

შესავალი ტექსტის შემდეგ, შეტყობინება მომხმარებელს დახმარების სამ ვარიანტს სთავაზობს:

  • "გაესაუბრეთ მეგობარს — მიწერეთ ან დაურეკეთ ვინმეს, ვისაც ენდობით."
  • "დაუკავშირდით ცხელ ხაზს — ისინი მოგისმენენ და სიტუაციის დაძლევაში დაგეხმარებიან."
  • "მიიღეთ რჩევები და მხარდაჭერა — იხილეთ, როგორ დაეხმაროთ საკუთარ თავს".

ფეისბუქის თქმით, პოტენციურად საგანგაშო პოსტის მონიშვნა ანონიმურად ხდება და თქვენი მეგობარი შემტყობინებლის ვინაობას ვერ დაინახავს.

ადრე ეს ფუნქცია მხოლოდ ზოგიერთ ინგლისურენოვან მომხმარებელთან იყო ხელმისაწვდომი. დღეიდან, იგი მსოფლიოს მასშტაბით, ეტაპობრივად ჩაირთვება. ჯერჯერობით უცნობია, იქნება თუ არა ეს შეტყობინება ნათარგმნი ქართულენოვან ინტერფეისშიც.