2 თებერვლის აქციაზე ეროვნული ბანკის ყოფილი პრეზიდენტი გიორგი ქადაგიძე შუაღამისას მაშინ დააკავეს, როცა აქციის მონაწილეები თბილისი მოლიდან რუსთაველის გამზირისკენ გადაადგილდებოდნენ.

აქციის მონაწილეების ინფორმაციით, ქადაგიძე საპროტესტო მსვლელობის მიმდინარეობისას, სანაპიროზე, ტროტუარზე დააკავეს.

გიორგი ქადაგიძის ადვოკატი, შოთა კახიძე ტვ პირველთან ამბობს, რომ გიორგი ქადაგიძე პოლიციის თანამშრომლებმა, ფაქტობრივად, ძალის გამოყენებით ჩასვეს მანქანაში.

"გიორგი ქადაგიძე საპროტესტო აქციის მსვლელობისას დააკავეს პოლიციის თანამშრომლებმა. ფაქტობრივად, ძალის გამოყენებით ჩასვეს მანქანაში. როგორც ჩვენთვის ცნობილია, იგი დაკავებულია ადმინისტრაციული წესით, რაიმე სახის დაზიანებები არ აღენიშნება, ცხადია იგი დაკავებულია ყოველგვარი საფუძვლის გარეშე, პოლიტიკური ნიშნით. როგორ განვითარდება მოვლენები ამასთან დაკავშირებით უკვე მოგვიანებით გახდება ცნობილი", — ამბობს ადვოკატი.

დაკავებულთა შორის არიან: კოალიცია ცვლილებისთვის წევრი ბადრი გრიგალაშვილი, აქტივისტი დიმიტრი ბიძინაშვილი. ასევე დააკავეს და მოგვიანებით ხელწერილის საფუძველზე გაათავისუფლეს კოალიცია ცვლილებისთვის ერთ-ერთი ლიდერი ნიკა მელია. სავარაუდოდ, დაკავებულია ასევე ოპოზიციონერი პოლიტიკოსი, გიგი უგულავა.

ფიზიკური ძალადობის მსხვერპლი გახდა მთავარის ჟურნალისტი დეა მამისეიშვილი და ტვ პირველის ოპერატორი ნიკო კოკაია, რომელიც ამ დრომდე კლინიკაშია.