29 იანვარს ჩრდილოეთ ოსეთის ლიდერმა სერგეი მენიაილომ დაადასტურა, რომ მისი შვილი (სერგეი მენიაილო უმცროსი) ფიგურირებდა გავრცელებულ ვიდეოში, სადაც ახალგაზრდა პოლიციის ოფიცერს უპირისპირდება.

ვიდეოში მენიაილოს შვილი ემუქრება პოლიციელს და ამბობს, რომ მამამისი რესპუბლიკის მეთაურია. ახალგაზრდა ახსენებს იმასაც, რომ მისი ძმა რუსეთის ფედერალურ სამსახურში (FSB) მუშაობს და პოლიციის ოფიცერს ადგილზე განადგურებით ემუქრება.

ვიდეოში მენიაილოს შვილი და რძალი აგრძელებენ ოფიცრის დამცირებას და მის მითითებებს არ ემორჩილებიან. რესპუბლიკის მოსახლეობაში ჩანაწერის ვირუსულად გავრცელებამ უკმაყოფილება გამოიწვია — მოქალაქეები საგზაო წესების დარღვევის სასჯელისგან კავშირების დახმარებით თავის არიდებას აკრიტიკებენ.

მოსახლეობის ნაწილი დასცინის მენიაილოს ვაჟს ავტომობილის უკანა სავარძელზე ჯდომისთვის, როცა მას ცოლი მართავს.

თავად სერგეი მენიაილომ პირად ტელეგრამ არხზე გაავრცელა ვიდეო, რომელშიც აღიარებს, რომ ასეთი ინციდენტი ნამდვილად მოხდა, თუმცა რამდენიმე თვის წინ და ახლა მხოლოდ იმიტომ გავრცელდა, რომ "გარკვეულ პირებს ამით სარგებლის მიღება სურთ".

მენიაილომ განაცხადა ისიც, რომ ინციდენტი ადგილზე მოგვარდა და ადგილი არ ჰქონია პოლიციის ოფიცრების წინააღმდეგ შურისძიებას. ჩრდილოეთ ოსეთის მეთაურმა დაამატა ისიც, რომ კადრები ისეა დამონტაჟებული, რომ მისი შვილი და რძალი უარყოფითი კუთხით აჩვენოს.

ჩრდილოეთ ოსეთის ლიდერის სიტყვებს ადასტურებს მისი რძლის განცხადებაც, რომელმაც თქვა, რომ ვიდეო შეცდომაში შემყვანადაა დამონტაჟებული და მისი ქმარი კომენტარს ვერ გააკეთებს არმიაში მისი პოზიციის გამო.

2022 წელს რუსეთის უკრაინაში სრულმასშტაბიანი შეჭრის პარალელურად, გადმოცემის თანახმად, მენიაილო ჩავიდა უკრაინაში, დაუზუსტებელ ადგილას, რათა ომში ჩართული ოსი ჯარისკაცებისთვის "მხარი დაეჭირა". ვიდეოში, რომლის ლოკაციის ავთენტურობაშიც ბევრმა ეჭვი შეიტანა, ისმის ჯარისკაცის ხმა, რომელიც ამბობს, რომ მენიაილოს ვაჟი ფრონტზე იბრძვის. ამ ინფორმაციის შემოწმება და დადასტურება შეუძლებელია.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.