მზია ამაღლობელის გათავისუფლების მოთხოვნით შეკრებილმა მედიის წარმომადგენლებმა პროკურატურიდან "ქართული ოცნების" გორგასლის ოფისთან გადაინაცვლეს.

"მოვითხოვთ სინდისის პატიმრის, მზია ამაღლობელის დაუყოვნებლივ გათავისუფლებას" - ამ მოთხოვნით ჟურნალისტები და სხვა მოქალაქეები პროკურატურასთან შეიკრიბნენ. ისინი ითხოვენ, უწყებამ დააყენოს მზია ამაღლობელისთვის აღკვეთის ღონისძიების შეცვლის საკითხი.

"ჩვენი მოთხოვნის მთავარი ადრესატი არის გაბიტაშვილი. მოვითხოვთ, რომ შეცვალოს აღკვეთი ღონისძიების შესახებ გადაწყვეტილება და დაუყოვნებლივ მიმართოს სასამართლოს. ასევე დღეს უკვე არის მე-16 დღე, რაც მზია. არის სრულ შიმშილობაზე. ეს ნიშნავს, რომ არ იღებს არანაირ დანამატს, იღებს მხოლოდ წყალს და მისი ეს გადაწყვეტილება არის მკაცრი. ის არ აპირებს უარს შიმშილობაზე. მოვუწოდებთ იუსტიციის სამინისტროს, მის ე.წ. მინისტრს ანრი ოხანაშვილს, ყოველ დღე, ყოველდღიურ რეჟიმში გამოვიდნენ და ჩაგვაბარონ ანგარიში მზია ამაღლობელის ჯანმრთელობის მდგომარეობის შესახებ" — აცხადებდნენ პროკურატურასთან შეკრებილი აქციის მონაწილეები.

შეგახსენებთ, დაკავებული ჟურნალისტი, "ბათუმელებისა" და "ნეტგაზეთის" დამფუძნებელი და ხელმძღვანელი, მზია ამაღლობელი უკვე მე-16 დღეა შიმშილობს.

ცნობისთვის, ბათუმელების და ნეტგაზეთის დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს

ბათუმელების ცნობით, მზია ამაღლობელთან 3 საათის განმავლობაში არ უშვებდნენ ადვოკატებს და, ასევე, უცნობი იყო, რა მუხლით იყო ის დაკავებული. იგი მოინახულა სახალხო დამცველის წარმომადგენელმა აჭარაში, რომელსაც მზია ამაღლობელმა უთხრა, რომ დაკავების შემდგომ ადგილი ჰქონდა არასათანადო მოპყრობას.