"ნიდერლანდები ყოველთვის მომხრე იყო რეპრესიებზე პასუხისმგებელი პირების მიმართ პერსონალური სანქციების დაწესების", — ამის შესახებ ნიდერლანდების საგარეო საქმეთა მინისტრმა, კასპარ ველდკამპმა ბრიუსელში ევროკავშირის საგარეო საქმეთა მინისტრების შეხვედრის დაწყებამდე განაცხადა. მან ისიც თქვა, რომ ძალიან შეშფოთებულია ჟურნალისტების მდგომარეობით ქვეყანაში. ამიტომაც ნიდერლანდებმა ჟურნალისტების დაცვისთვის დამატებითი რესურსები გამოყო.

„ნიდერლანდები ყოველთვის მომხრე იყო რეპრესიებზე პასუხისმგებელი პირების მიმართ პერსონალური სანქციების დაწესების. ახლა ვაჩერებთ სავიზო რეჟიმს დიპლომატიური პასპორტების მფლობელებისთვის, რაც მნიშვნელოვანი პირველი ნაბიჯია.

რაც შეეხება ჟურნალისტებსა და ჟურნალისტების თავისუფლებას, ძალიან შეშფოთებული ვარ. ამიტომაც არის, რომ ნიდერლანდებმა გამოყო დამატებითი რესურსები ჟურნალისტების დაცვისთვის. ასევე, მათთვის, ვინც დემონსტრაციების დროს დააკავეს.

ჩვენ ვდგავართ მათ გვერდით, ვისაც საქართველოს ევროპის გზის განვითარება სურს და ეს პერსპექტივა რჩება ძალაში. ჩვენ, ასევე, კრიტიკულები ვართ ჩატარებული არჩევნების მიმართ ოდირის ანგარიშის გათვალისწინებით", - თქვა ნიდერლანდების საგარეო საქმეთა მინისტრმა, კასპარ ველდკამპმა ბრიუსელში.

შეგახსენებთ, რომ ევროკავშირის საგარეო საქმეთა მინისტრები დღეს ბრიუსელში იკრიბებიან, სადაც სხვა საკითხებთან ერთად საქართველოზეც იმსჯელებენ. ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში, სავარაუდოდ, დღეს გაფორმდება. წინადადებაზე ევროკომისიამ იმუშავა, სამუშო დოკუმენტი 23 იანვრითაა დათარიღებული.

სხდომას ევროკავშირის უმაღლესი წარმომადგენელი საგარეო საქმეთა და უსაფრთხოების პოლიტიკის საკითხებში კაია კალასი უხელმძღვანელებს. შეხვედრა თბილისის დროით 13:00 საათზე დაიწყება.