ევროკავშირის წევრი ქვეყნების ელჩებმა ქართული დიპლომატიური და სამსახურებრივი პასპორტებისთვის უვიზო რეჟიმის შეჩერებას მხარი 24 იანვარს დაუჭირეს და შეზღუდვა ოფიციალურად ბრიუსელში, სავარაუდოდ, დღეს გაფორმდება. წინადადებაზე ევროკომისიამ იმუშავა, სამუშო დოკუმენტი 23 იანვრითაა დათარიღებული.

"წევრ სახელმწიფოებში და ევროკავშირში კავშირში საზოგადოებრივი წესრიგის დასაცავად მიზანშეწონილია და პროპორციულია, რომ წევრმა სახელმწიფოებმა მოითხოვონ ვიზა საქართველოს იმ მოქალაქეებისგან, რომლებსაც აქვთ მოქმედი დიპლომატიური პასპორტები, რომლებიც მიემგზავრებიან ევროკავშირში, რადგან ეს პირები წარმოადგენენ ინტერესებს, რომლებიც ეწინააღმდეგებიან იმას, რამაც სავიზო შეზღუდვების გამარტივება გამოიწვია", — ამის შესახებ ევროპის კავშირის საბჭოს 23 იანვრით დათარიღებულ დოკუმენტში ვკითხულობთ, სადაც დიპლომატიური პასპორტების მქონე საქართველოს მოქალაქეებისთვის სავიზო რეჟიმის შეჩერებაზეა საუბარი.

დოკუმენტში წერია, რომ 2024 წლის 28 ნოემბერს საქართველოს ხელისუფლებამ გამოაცხადა თავისი განზრახვა არ მოითხოვოს ევროკავშირთან გაწევრიანების მოლაპარაკებების გახსნა 2028 წლამდე. ამ განცხადებამ საქართველოს მრავალ ქალაქში მასობრივი პროტესტი გამოიწვია, რასაც საქართველოს ხელისუფლებამ არაპროპორციული ძალის გამოყენებით და ძალადობრივი მეთოდებით და აქციის მონაწილეების, პოლიტიკოსებისა და ჟურნალისტების თვითნებური დაკავებითა და არასათანადო მოპყრობით უპასუხა.

საქართველოს მიერ განხორციელებული ქმედებები არღვევს იმ ფუნდამენტურ პრინციპებს, რომლებზეც დაფუძნებული იყო შეთანხმება ფორმალობების გამარტივების შესახებ და ეწინააღმდეგება კავშირის და მისი წევრი სახელმწიფოების ინტერესებს.

კერძოდ, ეს ქმედებები პატივს არ სცემს ადამიანის უფლებებს და დემოკრატიულ პრინციპებს. ამიტომ არ შეესაბამება კავშირის ღირებულებებს და აფერხებს ეკონომიკის სტაბილურ განვითარებას, ჰუმანიტარულ, კულტურულ, სამეცნიერო და სხვა კავშირებს ევროკავშირსა და საქართველოს შორის, — ვკითხულობთ დოკუმენტში.

ცნობისათვის, "რადიო თავისუფლების" ევროპის ბიუროს რედაქტორი რიკარდ იოზვიაკი X-ზე დაწერა, რომ ევროკავშირის ელჩებმა ქართული დიპლომატიური პასპორტებისთვის სავიზო რეჟიმის შეჩერებაზე შეთანხმდნენ. საგარეო საქმეთა მინისტრები ამას ორშაბათს დაეთანხმებიან.

"ევროკავშირის ელჩებმა ქართული დიპლომატიური პასპორტებისთვის სავიზო რეჟიმის შეჩერებაზე დღეს დილით მწვანე შუქი აანთეს. საგარეო საქმეთა მინისტრები ამას ორშაბათს დაეთანხმებიან. უნგრეთი და სოლოვაკეთი წინააღმდეგ მისცემენ ხმას, მაგრამ არ აქვს მნიშვნელობა, რადგან აქ კვალიფიციური უმრავლესობაა," — დაწერა იოზვიაკმა.