დაზარალებულის წარმომადგენლის ჩვენება ძალიან მნიშვნელოვანი მტკიცებულება იყო, რადგან დადასტურდა ყველა არსებული გარემოება და ბრალის ყველა ის კომპონენტი, რასაც ბრალდება გიორგი ბაჩიაშვილს ედავება. — ამის შესახებ პროკურორმა მიხეილ სადრაძემ "ქართული ოცნების" დამფუძნებლის, ბიძინა ივანიშვილის ადვოკატის, თეიმურაზ წიქვაძის დაკითხვის შემდეგ განაცხადა.

პროკურორი ამტკიცებს, რომ მოწმის ჩვენება საქმეში არსებულ მტკიცებულებებთან თანხვედრაშია.

"ცალსახად დადასტურდა, რომ დაზარალებული ინვესტორია და ბრალდებულმა ეს თანხა მიითვისა, შემდეგ კი აქტივების ლეგალიზაცია მოახდინა. მისი ჩვენება მნიშვნელოვანი იყო, რადგან განმარტებები დოკუმენტებთან სრულად თანხვედრაშია, ამ ორ მოცემულობას შორის სრული თანხვედრაა, რაც მტკიცებულების ხარისხზე და მნიშვნელობაზე მიუთითებს", — განაცხადა პროკურორმა.

კითხვაზე, როდის გამოიძახებენ დაკითხვაზე ბიძინა ივანიშვილს, პროკურორმა განაცხადა, რომ ეს წინასწარ მისთვისაც უცნობია, რადგან სხვადასხვა სტრატეგია შეიძლება აირჩიოს, თუმცა ვინც არსებით ინფორმაციას ფლობს, მისი განცხადებით, ყველა დაიკითხება..

გიორგი ბაჩიაშვილისთვის წარდგენილი ბრალდება 2017 წელს განხორციელებულ ქმედებას ეხება. პროკურატურის ინფორმაციით, ბაჩიაშვილმა ინვესტორს ჩადებული ინვესტიციიდან მიღებული სრული მოგების სანაცვლოდ მხოლოდ 536 900 აშშ დოლარი გადასცა, ხოლო დარჩენილი ინვესტორის კუთვნილი 8986 ოდენობის ბიტკოინი მართლსაწინააღმდეგოდ მიითვისა, რომლის ღირებულებაც მისი მართლსაწინააღმდეგოდ დაუფლების პერიოდში 43 მილიონამდე აშშ დოლარს შეადგენდა.

გიორგი ბაჩიაშვილი წარდგენილ ბრალდებაში თავს დამნაშავედ არ მიიჩნევს.