თბილისის საქალაქო სასამართლოში მოსამართლე, ნინო თარაშვილმა არ დააკმაყოფილა ძლიერი საქართველოს ერთ-ერთი ლიდერის, ალეკო ელისაშვილის საქმის შეწყვეტის მოთხოვნა და არსებითი განხილვა 6 თებერვალს 12:00-ზე ჩანიშნა.

წინასასამართლო სხდომაზე, სადაც დაცვისა და ბრალდების მხარის მტკიცებულებების დასაშვებობაზე იმსჯელეს, ალეკო ელისაშვილის ადვოკატებმა საქმის შეწყვეტაც მოითხოვეს, არგუმენტით, რომ პროკურატურას პოლიტიკური დევნის დამადასტურებელი მტკიცებულებები არ აქვს.

პოლიტიკოსს 2024 წლის 2 დეკემბერს თბილისში, კოსტავას ქუჩაზე აზერბაიჯანთა ეროვნული კონგრესის თავმჯდომარესა და "ქართული ოცნება დემოკრატიული საქართველოს", პოლიტიკური პარტიის ერთ-ერთ დამფუძნებელზე ფიზიკურ და სიტყვიერ შეურაცხყოფას ედავებიან.

მოსამართლემ დასაშვებად არ ცნო დაცვის მხარის მიერ სასამართლოზე წარმოდგენილი ქუჩის ვიდეოგამოკითხვა, სადაც ადვოკატ, ზვიად კორძაძის თქმით ჩანს, რომ ალი ბაბაევის პოლიტიკურ მოღვაწეობას არავინ არ იცნობს და შესაბამისად, პოლიტიკური ნიშნით დევნის კვალიფიკაცია კითხვის ნიშნის ქვეშ დგება.

"დაზარალებულის ჩვენების გარდა, მტკიცებულება არ არსებობს. პროკურატურას არ აქვს შეფასებული ისეთი მნიშვნელოვანი საკითხი, როგორიცაა ე.წ. დაზარალებულის ქმედება ალეკო ელისაშვილის მიმართ, დაკავების დროს ძალადობის მდგომარეობა და საერთოდ ეს საქმე შეიძლება ითქვას, რომ არ არსებობს, იმიტომ, რომ მტკიცებულება, რომელიც პოლიტიკური ნიშნით დევნას ადასტურებს საქმეში არ არის.", — თქვა ზვიად კორძაძემ.

პროკურორის ზვიად გუბელაძის თქმით, სისხლის სამართლის საქმეში არაერთი მტკიცებულებაა, სადაც სრულყოფილად ასახულია ალექსანდრე ელისაშვილის მიერ ძალადობის ფაქტი. მისი განცხადებით, მომხდარის მოტივი არის პოლიტიკური მოღვაწეობა, რადგანაც დაზარალებული ალი ბაბაევი იყო ერთ-ერთი პოლიტიკური პარტიის ერთ-ერთი დამფუძნებელი.

ალეკო ელისაშვილი "ქართული ოცნების" წევრ ალი ბაბაევზე თავდასხმის ბრალდებით დააკავეს.

მას ბრალი ედება სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის (ძალადობის გამოყენებით ჩადენილი დევნა), რომელიც სამ წლამდე ვადით თავისუფლების აღკვეთას ითვალისწინებს.