თბილისის საქალაქო სასამართლოს მოსამართლემ მანუჩარ ცაცუამ ტელეწამყვანი ნანუკა ჟორჟოლიანი სამართალდამრღვევად მიიჩნია და 5000 ლარით დააჯარიმა.

შსს მას 3 იანვარს აქციაზე ხალხის არასაკმარისი რაოდენობის პირობებში გზის ხელოვნურად გადაკეტვას ედავებოდა.

ნანუკა ჟორჟოლიანმა სხდომის დასაწყისში მოსამართლის აცილება მოითხოვა, ჟურნალისტი დაინტერესდა, იყო თუ არა 12 იანვარს რესტორან "ბაბილოში" მოსამართლეთა კორპორაციულ შეკრებაზე მანუჩარ ცაცუა. ტელეწამყვანის განმარტებით, შესაძლოა, მოსამართლეს "პირდაპირი წყენა და ბრაზი ჰქონდეს მის მიმართ", რადგან იმ დღეს აქციის აქტიური მონაწილე იყო.

მოსამართლე ცაცუამ ჟორჟოლიანის შეკითხვას არ უპასუხა და განაცხადა, რომ აცილების შუამდგომლობა დაუსაბუთებელია.

ნანუკა ჟორჟოლიანმა სასამართლოზე შსს პატივისცემა დაუდასტურა და განაცხადა, რომ საფუძველს მოკლებულია ბრალდება, რომ პოლიციელის კანონიერ მოთხოვნას არ დაემორჩილა.

"უპირველეს ყოვლისა, ვადასტურებ ჩემს პატივისცემას იმ ინსტიტუტის მიმართ, რომელსაც თქვენ წარმოადგენთ. ძალიან მნიშვნელოვანია, რომ თქვენ ეს იცოდეთ. ჩვენს შორის ყოველთვის ორმხრივი თანამშრომლობაა, ნებისმიერ შემთხვევაში ამას პატრულის ყველა თანამშრომელი დაადასტურებს, ყოველთვის გამოვხატავ ღია და საჯარო სიმპატიას მათ მიმართ. მე არ მჯერა იმის, რომ პოლიციელმა მითხრა, რომ ეს უკანონობაა და მე სხვაგვარად ვიმოქმედე.
ამ სასამართლოში მიდის პროცესები და ადამიანებს აჯარიმებენ, რომლებიც იქ საერთოდ არ ყოფილან, თავის თავს ვერ ცნობენ მასალაში და აჯარიმებენ ისეთებს, რომლებიც უკვე გადაკეტილზე მიდიან. აქედან გამომდინარე, ის მტკიცებულება, რომელიც თქვენ წარადგინეთ, არ მაძლევს საშუალებას, რომ მე თქვენთან დავაში შემოვიდე, ამ შემთხვევაში საშუალებას ვგულისხმობ, მორალურ მიზეზს არ მაძლევს, რადგან მე ვიცი, ადამიანები როგორ არაფრის გამო ჯარიმდებიან, არაფრის გამო მიდიან ციხეში და როგორ არაფრის გამო ისჯებიან. ამიტომ თქვენ გაქვთ ის მიზეზი და მე ვხედავ ამ მიზეზს, რომ შეიძლება, თქვენ საკმარისად ჩათვალოთ ადმინისტრაციული ჯარიმის დასაკისრებლად, ამიტომ დავზოგავ თქვენს დროს, მოსამართლის დროს, მიუხედავად იმისა, რომ არ მჯერა, რომ პატრულმა სამართალდარღვევისკენ მივუთითე და არ დავემორჩილე… მიუხედავად ამისა, გეუბნებით, ის ვიდეო, რომელიც წარადგინეთ საკმარისია, ჩაითვალოს, რომ გზა გადავკეტე. ამიტომ თუ სასამართლო დამაჯარიმებს, მე ვიღებ ამ ჯარიმას, როგორც იმ ჯარიმას, რომელიც უნდა გადავიხადო. აქვე განვმარტავ, ხვალ და ზეგ მე მაინც წავალ რუსთაველის გამზირზე.", — თქვა მან.

სხდომაზე გამოჰკითხეს მოწმე პოლიციელიც, რომელმაც თქვა, რომ ნანუკა ჟორჟოლიანთან არ მისულა, თუმცა იმ დროს გზაზე ვინც გადავიდა, ყველას განუმარტა, რომ კანონს არღვევდა.

შსს-ს წარმომადგენელთან კითხვა-პასუხის ეტაპზე ნანუკა ჟორჟოლიანმა განაცხადა, რომ გზის გადაკეტვა იქნება მანამ, ვიდრე "პოლიტიკურ და სინდისის პატიმრებს გარეთ არ გამოუშვებენ".

ნანუკა ჟორჟოლიანის მიმართ ადმინისტრაციული სამართალწარმოება მიმდინარეობდა ადმინისტრაციული კოდექსის 174-ე პრიმა მუხლით, რომელიც შეკრების და მანიფესტაციების წესის დარღვევას გულისხმობს და 5000-ლარიან ჯარიმას ან ადმინისტრაციულ პატიმრობას ითვალისწინებს.