გიორგი ოკმელაშვილის საქმის განაჩენი 24 იანვარს, 14:00 საათზე გამოცხადდება, ამის შესახებ დღევანდელ სხდომაზე გახდა ცნობილი. საქმეს მოსამართლე გიორგი გელაშვილი განიხილავს.

გასული წლის მაისში, "აგენტების კანონის" საწინააღმდეგო აქციაზე დაკავებული გიორგი ოკმელაშვილის ადვოკატმა, კობა ბარამიამ დღეს, 15 იანვარს გამართულ სხდომაზე მოითხოვა სისხლის სამართლის კოდექსის 260-ე მუხლით (ნარკოტიკული საშუალებების შენახვა) წაყენებული ბრალის მოხსნა, რასაც პროკურორი დაეთანხმა. ამ მუხლით ჩადენილ დანაშაულს პარლამენტის მიღებული ამნისტიის კანონი შეეხო.

"ოკმელაშვილი იმყოფებოდა აუცილებელი მოგერიების — აუცილებელი თავდაცვისა და სხვა პირების დაცვის — ფარგლებში. ამ ვიდეოში [მტკიცებულებაში] ჩანს, რომ პოლიციელები უახლოვდებიან დემონსტრანტებს. იმ დემონსტრანტებს, რომელთა ნაწილი შემთხვევამდე რამდენიმე ხნით ადრე გაიტაცეს. ეს კადრები რასაც ასახავს, გატაცებაა, დაკავება არ არის", — თქვა ადვოკატმა კობა ბარამიამ.

ოკმელაშვილის საქმის განხილვა დაიწყო 16 ივლისს. აღნიშნული საქმის ბოლო სხდომა კი 3 ოქტომბერს ჩატარდა, ხოლო ამის შემდეგ სხდომა ფაქტობრივად აღარ გამართულა — 2024 წლის 15 ოქტომბერს სხდომა პროკურორის გამოუცხადებლობის გამო გადაიდო და დასკვნითი სხდომა 12 დეკემბერს ჩაინიშნა. ამის შემდეგ, მოსამართლემ 12 დეკემბერს ჩანიშნული სხდომა პროკურორის მოთხოვნით გადადო, რადგან, იგი დასკვნითი სიტყვისთვის მზად არ იყო.