გახარია საქართველოსთვის ერთ-ერთი ლიდერი, ნათია მეზვრიშვილი წუხელ, ბათუმში პარტიის ლიდერ, გიორგი გახარიაზე თავდასხმას ეხმაურება და სოციალურ ქსელში წერს, რომ დანაშაულის ადგილზე პერიმეტრი რომ განზრახ არ იყო დაცული და პოლიცია დაგვიანებით მივიდა, ამის მტკიცებულება არსებობს.

"ვესაუბრე გამომძიებელს და მათივე ინტერესშია, ამის მიუხედავად, ყველაფერი ამოიღონ (რაც სავსებით შესაძლებელია), თავის კამერებიანად.

მტკიცებულებების განადგურება უკვე იკვეთება. ამიტომ, მოუწევთ ესეც გამოიძიონ და ამტკიცონ, რომ არ გაუნადგურებიათ", — წერს მეზვრიშვილი.

ის შინაგან საქმეთა სამინისტროს და საქართველოს პროკურატურასაც მიმართავს, რომ "ცუდად იქნება მათი საქმე, თუ ერთი მტკიცებულება — კამერები, ანაბეჭდები და ა.შ. იქნება განადგურებული".

ის ცალკე მიმართავს პროკურატურას, რომ 24 საათში დააკავონ თავდამსხმელები, წინააღმდეგ შემთხვევაში — "მათაც მიაკითხავენ".

"ყველას მოგაკითხავთ, წარმოდგენა არ გაქვთ რამხელა შეცდომა დაუშვით „ქართული ოცნება“, დანდობა არ იქნება, გპირდებით!

საქართველოს პროკურატურა, 24 საათში არ იქნება ყველა თავდამსხმელი დაკავებული და თქვენც მოგაკითხავთ!

ივანიშვილი, საბრალდებო სკამზე დაგსვამ პირადად!", —წერს ნათია მეზვრიშვილი.

გიორგი გახარიას ბათუმში, სასტუმრო "შერატონში", სავარაუდოდ, ქართული ოცნების დეპუტატები თავს დაესხნენ, რის შემდეგაც ის კლინიკაში გადაიყვანეს, სადაც მას ცხვირის ძვლის მოტეხილობა და ტვინის შერყევა დაუდგინდა.

როგორც ჟურნალისტი გელა მთივლიშვილის წერს, გახარიაზე თავდამსხმელებს შორის იყვნენ: ოცნების დეპუტატი დიმიტრი სამხარაძე და აჭარის ფინანსთა და ეკონომიკის მინისტრის მოადგილე გიორგი მანველიძე. მანამდე, გიორგი მანველიძე შერატონის ფოიეში ჟურნალისტ ზვიად ქორიძეს დაესხა თავს.

ამავე თემაზე: