ჰუმანიტარული დახმარების სახით, ევროკომისიამ უკრაინას 148 მილიონი ევრო გამოუყო — წერია ევროკავშირის მიერ გავრცელებულ განცხადებაში.

"ვინაიდან რუსეთის აგრესიული ომი აგრძელებს უკრაინის განადგურებას, გადაუდებელი დახმარება, დაახლოებით, 12.7 მილიონ ადამიანს ესაჭიროება. ევროკომისიის ახალი დაფინანსება გამოყენებული იქნება სიცოცხლოდ მნიშვნელოვანი მხარდაჭერის უზრუნველსაყოფად და უკრაინის ყველაზე მოწყვლადი მოსახლეობისთვის აუცილებელი დახმარების უზრუნველსაყოფად. 148 მილიონი ევროს ახალი დაფინანსება გააგრძელებს სასიცოცხლო მნიშვნელობის ჰუმანიტარული დახმარების მხარდაჭერას როგორც უკრაინაში, ასევე მოლდოვაში", — აღნიშნულია ინფორმაციაში.

როგორც კომისია ამბობს, 140 მილიონი ევრო უკრაინაში ჰუმანიტარული პროექტებზე, გადაუდებელ დახმარებებზე იქნება მიმართული მათ შორის, საკვების, ჯანდაცვის, სუფთა წყლის და ზამთრის პერიოდში დაცვის უზრუნველსაყოფად. დაფინანსების ძირითადი პრიორიტეტებია მოწყვლადი მოსახლეობის მხარდაჭერა აღმოსავლეთ და სამხრეთ უკრაინის ომით დაზარალებულ რეგიონებში.

ამავდროულად, 8 მილიონი ევრო მოლდოვაში ჰუმანიტარული პროექტებისთვის არის გამოყოფილი. დახმარება გამოყოფილია უკრაინელი ლტოლვილებისა და მოლდოვური მასპინძელი თემების დახმარებაზე, ასევე ისეთი კრიტიკული სერვისების წვდომაზე, როგორიცაა ჯანდაცვა, განათლება და ფსიქოსოციალური დახმარება.

ევროკომისიაში განმარტავენ, რომ დახმარების აღნიშნული პაკეტით მათ მიერ უკრაინისთვის გამოყოფილი ჰუმანიტარული დახმარების საერთო ღირებულება 1.1 მილიარდ ევროს გადააჭარბებს.