"ყველა ეს ცვლილება, რომელიც დღეს შევიდა ძალაში, მხოლოდ იმიტომ მიიღეს, რომ ჩვენ მათზე ამდენი ვილაპარაკოთ და შეგვეშინდეს. მათი მიზანია გვემუქრებოდეს, რადგან რეჟიმი ყოველთვის იმუქრება", — ამის შესახებ კონსტიტუციონალისტი ვახუშტი მენაბდე წერს და 29 დეკემბერს ოცნების არჩეული პრეზიდენტის, მიხეილ ყაველაშვილის მიერ რეპრესიული კანონების ხელმოწერას და ძალაში შესვლას ეხმაურება.

ვახუშტი მენაბდე წერს: "არ გვეშინია მუქარის, რადგან ამ კანონების გარეშეც ვიცოდით რომ მკაცრად, უსამართლოდ, მოულოდნელად, მხოლოდ და მხოლოდ იმისთვის დაგვსჯიდნენ, რომ საკუთარ ქვეყანას, ერთმანეთს და დემოკრატიას ვიცავთ".

"ახლა რაც შეეხება ახლად ამოქმედებულ კანონებს.

დიახ, ეს კანონები მკაცრია;

დიახ, ეს კანონები ითვალისწინებს შეუსაბამოდ დიდ ჯარიმებს;

დიახ, ეს კანონები არაგანჭვრეტადია;

დიახ, ეს კანონები გვსჯიან პროტესტისთვის;

დიახ, ეს კანონები უსამართლოა.

მაგრამ ამ კანონებამდე რეჟიმს უჭირდა სიმკაცრე? არ გვიწესებდა ჯარიმებს? გაუგებარ პრეტენზიებს არ გვიყენებდა? მართლა წესრიგის აღდგენა ხომ არ სურდა? სამართლიანად იყენებდა ნორმებს?

რეჟიმს რეპრესიისთვის კანონი არ სჭირდება. ტიტუშკები სამართლის საფუძველზე არ მოქმედებენ; ადამიანის წამება ადმინისტრაციულ სამართალდარღვევათა კოდექსით არ არის გათვალისწინებული; ცრუ მოწმეებით ადამიანების გასამართლებას საპროცესო კანონმდებლობა არ უშვებს.

ყველა ეს ცვლილება, რომელიც დღეს შევიდა ძალაში, მხოლოდ იმიტომ მიიღეს, რომ ჩვენ მათზე ამდენი ვილაპარაკოთ და შეგვეშინდეს. მათი მიზანია გვემუქრებოდეს, რადგან რეჟიმი ყოველთვის იმუქრება.

ჩვენ არ გვეშინია მუქარის, რადგან ამ კანონების გარეშეც ვიცოდით რომ მკაცრად, უსამართლოდ, მოულოდნელად, მხოლოდ და მხოლოდ იმისთვის დაგვსჯიდნენ, რომ საკუთარ ქვეყანას, ერთმანეთს და დემოკრატიას ვიცავთ.

აქ ჩვენთვის არაფერი ახალი არ არის. ეს ჩვენ ჯერ კიდევ მაშინ ვიცოდით, როცა წინააღმდეგობის ლოზუნგად ვაქციეთ სიტყვები: “ყველგან პოლიცია, არსად სამართალი!", — წერს ვახუშტი მენაბდე.

შეგახსენებთ, რომ 30 დეკემბრიდან ძალაში შევიდა შემდეგი ცვლილებები:

• გაზრდილი ჯარიმა დასახლებულ პუნქტში სატრანსპორტო საშუალებებით ორგანიზებულად გზის გადაკეტვის ან ჯგუფურ მოძრაობაში მონაწილეობისთვის, როდესაც გზის სავალი ნაწილი სრულად არის დაკავებული (1000 ლარის ჯარიმა და მართვის უფლების 1 წლით შეჩერება);
• ჯარიმები მუნიციპალიტეტის ადმინისტრაციულ საზღვრებში არსებული ტერიტორიის იერსახის დამახინჯებისა და ვანდალიზმისთვის (1000 - 3500 ლარამდე);
• ახალი სამართალდარღვევები:
• შსს-ს სისტემაში დადგენილი ფორმის ტანსაცმლის ან ატრიბუტიკის უკანონოდ ტარება ან/და დადგენილი ფორმის ტანსაცმლისთვის ან ატრიბუტიკისთვის მიმსგავსებული ტანსაცმლის/ატრიბუტიკის ტარება (2000 ლარი, სამართალდარღვევის საგნის კონფისკაციით);
• შეკრება-მანიფესტაციის დროს პიროტექნიკური ნაწარმის, ლაზერული გამოსხივების ან/და მკვეთრი გამოსხივების მქონე ისეთი საშუალების ქონა, რომლის გამოყენებამ შეიძლება ხელი შეუშალოს სახელმწიფო უწყებების წარმომადგენელთა საქმიანობას ან/და მათ სარგებლობაში არსებულ ტექნიკურ საშუალებათა გამართულ ფუნქციონირებას;
• ასევე, სახის ნიღბით ან ნებისმიერი სხვა საშუალებით დაფარვა (2000 ლარის ჯარიმა);
• შეკრებებისა და მანიფესტაციების სხვა წესების დარღვევისთვის გაზრდილი ჯარიმები (500 ლარის ნაცვლად 5000 ლარი, ორგანიზატორზე - 15000 ლარი).