13 დეკემბერს ჟენევაში გაეროს ექსპერტებმა დაგმეს რეპრესიებისა და ადამიანის უფლებების დარღვევის ფაქტები საქართველოში. მათ აღნიშნეს, რომ ქართული ოცნება ქვეყანაში სპონტანური სახალხო პროტესტის ჩახშობას ცდილობს — ამის შესახებ ინფორმაციას გაეროს ოფიციალურ გვერდზე ვკითხულობთ.

"ჩვენ ვხედავთ სახელმწიფო უსაფრთხოების ძალების ყოველდღიურ ძალადობას მშვიდობიანი მომიტინგეების მიმართ, მასობრივ თვითნებურ დაპატიმრებებსა და მათ სისხლის სამართლის პასუხისგებაში მიცემას, მთავრობისა და მისი კონტროლის ქვეშ მყოფი სახელმწიფო უწყებების მიერ განხორციელებულ ცილისმწამებლურ კამპანიას მომიტინგეების, განსაკუთრებით ახალგაზრდების, სამოქალაქო საზოგადოებისა და უფლებადამცველების სტიგმატიზაციისა და დაშინების მიზნით", — განაცხადეს ექსპერტებმა.

ამასთან, გაეროს ოფიციალურ საიტზე საქართველოს შესახებ სტატიაში ვკითხულობთ, რომ 2024 წლის 10 დეკემბრის მდგომარეობით, საპროტესტო აქციებში მონაწილე 357 პირი დააკავეს. საქართველოს სახალხო დამცველმა 327 დაკავებული პირი მოინახულა, 225-მა პოლიციის მხრიდან არასათანადო მოპყრობაზე, ხოლო 157-მა კი დაზიანებებზე მიუთითა. აქციის მონაწილეებს სისხლის სამართლისა და ადმინისტრაციული სამართალდარღვევებისთვის სასამართლოებში ასამართლებენ. თუმცა, საპოლიციო ძალების მიერ განხორციელებული თავდასხმები სრულია დაუსჯელია.

"ჩვენ ზრდადი შეშფოთებით ვაკვირდებოდით, როდესაც საქართველოს მთავრობამ შეზღუდა სივრცე გამოხატვის თავისუფლების, გაერთიანების, შეკრების და ადამიანის უფლებათა დამცველებისთვის ქვეყანაში, განსაკუთრებით 2023 წლის თებერვლის შემდეგ, როდესაც ხელისუფლებამ პირველად წარადგინა კანონპროექტი "უცხო ქვეყნის აგენტების" შესახებ", — განაცხადეს ექსპერტებმა.

გაეროს ექსპერტები აღნიშნავენ, რომ უახლოესი მოვლენებიდან გამომდინარე, მმართველი ძალა განსხვავებული აზრის სრულმასშტაბიან ჩახშობას კიდევ უფრო მიუახლოვდა.

"თუმცა უახლესი დარბევის შედეგად, მთავრობა, როგორც ჩანს, კიდევ უფრო მიუახლოვდა განსხვავებული აზრის სრულმასშტაბიან ჩახშობას, რაც შეიძლება კიდევ უფრო გაუარესდეს, თუ "შეკრებებისა და მანიფესტაციების შესახებ კანონი" საპროტესტო აქციების შეზღუდვების გაზრდის მიზნით შეიცვლება", — ვკითხულობთ გაეროს ოფიციალურ გვერდზე.

გაეროს ექსპერტებმა შეშფოთება გამოხატეს საქართველოში არსებულ ვითარებაზე და ხაზგასმით აღნიშნეს, რომ განსაკუთრებით 14 დეკემბერს, დაგეგმილი საპრეზიდენტო არჩევნების წინ, რეპრესიების გამწვავებაა მოსალოდნელი.

“სერიოზულად შეშფოთებულები ვართ, რომ რეპრესიები შეიძლება გამწვავდეს, განსაკუთრებით შაბათს, 14 დეკემბერს დაგეგმილი საპრეზიდენტო არჩევნების წინ. მთავრობამ დაუყოვნებლივ უნდა შეცვალოს კურსი და უზრუნველყოს ადამიანის უფლებების სრული პატივისცემა. მთავრობამ სასწრაფოდ უნდა შეცვალოს კურსი და ეძიოს ეროვნული შერიგება, რაც უზრუნველყოფს ადამიანის უფლებების სრულ პატივისცემას", — აცხადებენ ექსპერტები.

აღნიშნულთან დაკავშირებით, სპეციალური მომხსენებლები მუდმივ კონტაქტზე არიან ქართული "ოცნების" წარმომადგენლებთან. მათ პარტიას შეახსენეს წინა კომუნიკაცია ქვეყანაში ადამიანის უფლებათა მდგომარეობის გაუარესების შესახებ, მათ შორის გაუზიარეს გაეროს სპეციალური მომხსენებლის 2024 წლის მარტის ანგარიში ადამიანის უფლებადამცველთა შესახებ. სპეციალური მომხსენებლები გამოთქვამდნენ მზადყოფნას, რომ ითანამშრომლონ მმართველ ძალასთან საქართველოში ადამიანის უფლებების მდგომარეობის გაუმჯობესებისთვის.

საქართველოს ქალაქებსა და სოფლებში ფართომასშტაბიანი აქციები მას შემდეგ იმართება, რაც ირაკლი კობახიძემ 28 ნოემბერს განაცხადა, რომ საქართველო ევროკავშირში გაწევრიანებას 2028 წლამდე შეაჩერებს.

საქართველოში არსებული სიტუაციის წარდგენაში, გაეროს სტატიაში ვკითხულობთ, რომ ქართულმა ოცნებამ აქციის მონაწილეებს "სასტიკად" უპასუხა.

"ყოველდღიურად ვრცელდებოდა სურათები მშვიდობიანი მომიტინგეების წინააღმდეგ ნიღბიანი პოლიციელების მხრიდან ძალადობრივი თავდასხმების შესახებ, მათ შორის წყლის ჭავლისა და ცრემლსადენი გაზის ბოროტად გამოყენებით. საპროტესტო აქციები ძირითადად მშვიდობიანი იყო, მიუხედავად დემონსტრანტების მხრიდან გარკვეული ტიპის ძალადობის ცალკეულ შემთხვევების გამოყენების შესახებ ანგარიშებისა, რომელიც ძირითადად პოლიციის მიერ ძალის გამოყენების საპასუხოდ ხდებოდა", — ვკითხულობთ გაეროს მიერ გავრცელებულ სტატიაში.