ნეტგაზეთის ცნობით, ეუთო/ოდირის განცხადებით, პასკალ ალიზარდი, რომელიც ქართულმა ოცნებამ და პროსახელისუფლებო მედიამ ეუთოს სადამკვირვებლო მისიის ხელმძღვანელად წარმოაჩინა, ოდირთან ასოცირებული არაა და მათი სახელით არ საუბრობს.

2 დეკემბერს ქართული ოცნების პრემიერმინისტრმა ირაკლი კობახიძემ განაცხადა, რომ ეუთოს სადამკვირვებლო მისიის ხელმძღვანელმა წერილით მიმართა მაკა ბოჭორიშვილს და აღნიშნული წერილი მან ეუთო/ოდირის მხრიდან არჩევნების აღიარებად წარმოაჩინა. ირაკლი კობახიძის ბრიფინგის შემდეგ პროსახელისუფლებო მედიამ პასკალ ალიზარდი მანიპულაციურად ეუთოს სადამკვირვებლო მისიის ხელმძღვანელად წარმოაჩინა.

სინამდვილეში, პასკალ ალიზარდი, რომელიც საფრანგეთის სენატისა და ეუთოს საპარლამენტო ასამბლეის წევრია, საქართველოს საპარლამენტო არჩევნებზე ეუთოს სპეციალური კოორდინატორი და მოკლევადიანი სადამკვირვებლო მისიის ხელმძღვანელი იყო. სწორედ ასე აწერს ის ხელს მაკა ბოჭორიშვილისთვის გამოგზავნილ წერილს.

ნეტგაზეთმა საკითხის გასარკვევად ეუთო/ოდირს მიმართა. პასუხად გამოგზავნილ წერილში ოდირი ხაზგასმით აღნიშნავს, რომ პასკალ ალიზარდი ორგანიზაციასთან დაკავშირებული არ არის და არც მათი სახელით საუბრობს.