ბაშარ ალ-ასადი ოჯახთან ერთად მოსკოვში ჩავიდა — ამის შესახებ ინფორმაციას რუსული სამთავრობო პროპაგანდისტული მედია ТАСС ავრცელებს.

"ასადი ოჯახის წევრებთან ერთად მოსკოვში ჩამოვიდა. რუსეთმა, ჰუმანიტარული მიზეზებიდან გამომდინარე, მას თავშესაფარი მიანიჭა", — ამბობს მედიის წყარო.

ამასთან, მედიაში გავრცელებული იყო არაოფიციალური ცნობა, რომ ბაშარ ალ-ასადის თვითმფრინავმა კურსს გადაუხვია და შესაძლოა ჩამოვარდა.

შეგახსენებთ, 8 დეკემბერს, ასათის რეჟიმი, რომელიც ათწლეულებია გრძელდება, ჰაიათ თაჰრირ ალ-შამის (HTS) მეთაურობით წამოწყებული იერიშის შედეგად ჩამოიშალა. მეამბოხეები, რომლებსაც თურქეთის მხარდაჭერა აქვს, რამდენიმე დღის განმავლობაში აგრძელებდნენ წარმატებულ სამხედრო ოპერაციებს.

თურქეთის მიერ მხარდაჭერილი მეამბოხეები დაპირისპირებულები არიან ამბოხებულ ქურთებთან, რომლებიც სირიის ტერიტორიის ნაწილს აკონტროლებენ.