ბათუმის საქალაქო სასამართლომ ლგბტ აქტივისტები, თანასწორობის მოძროაბის წევრები ლევან ბერიანიძე და თორნიკე კუსიანი სამართალდამრღვევებად სცნო და თითოეულს 300-ლარიანი ჯარიმა დააკისრა. სასამართლოს გადაწყვეტილება რამდენიმე წუთის წინ გახდა ცნობილი, რომლის შესახებაც On.ge-ს იურისტმა სალომე ღოღობერიძემ აცნობა.

სასამართლოს გადაწყვეტილებას ლევან ბერიანიძე ფეისბუკზე გამოეხმაურა და დაწერა: "სასამართლომ დამნაშავედ გვცნო და 300-ლარიანი ჯარიმა გამოგვიწერა".

სასამართლომ მიიჩნია, რომ მათ დაარვიეს ადმინისტრაციულ სამართალდარღვევათა კოდექსის 166-ე (წვრილმანი ხულიგნობა) და 173-ე (პოლიციისთვის დაუმორჩილებლობა) მუხლები.

25 აგვისტოს, გამთენიისას, ბათუმის ბულვარში პოლიციამ თანასწორობის მოძრაობის აღმასრულებელი დირექტორი ლევან ბერიანიძე და ორგანიზაციის წევრი თორნიკე კუსიანი დააკავა. დაკავებულები ამბობდნენ, რომ მათ პოლიციელებმა სიტყვიერი და ფიზიკური შეურაცყოფა მიაყენეს. სხეულზე ფიზიკური ძალადობის კვალზე შსს აცხადებდა, რომ "დაუდგენელი პირები და დაკავებულები ერთმანეთს ფიზიკურ და სიტყვიერ შეურაცხყოფას აყენებდნენ", თუმცა ადგილზე მისულ სამართალდამცველებს ბერიანიძე და კუსიანი არ დაემორჩილნენ და პოლიციამ ისინი დააკავა.