ტელეკომპანია ფორმულის დამფუძნებლისა და ყოფილი თავდაცვის მინისტრის, დავით კეზერაშვილის კუთვნილ სახლებში სამართალდამცავები საგამოძიებო მოქმედებებს ატარებენ. ერთ-ერთ ბინაში ერთიანობა - ნაციონალური მოძრაობის საზოგადოებასთან ურთიერთობის მდივანი დიმიტრი ჩიქოვანი ცხოვრობს.

ამ დროისათვის უცნობია, რა საქმის ფარგლებში დაინიშნა საგამოძიებო მოქმედებები დავით კეზერაშვილის სახლებში. კეზერაშვილის ადვოკატის ცნობით, დამატებითი დეტალების შესახებ ინფორმაცია მას შემდეგ გახდება ცნობილი, რაც ბინების ჩხრეკა დასრულდება.

გავრცელებული ინფორმაციის თანახმად, ბინის ჩხრეკას, რომელშიც დიმიტრი ჩიქოვანი ცხოვრობს, მისი დედა დაესწრება.

“ისე გადაფსიხდა ე.წ ხელისუფლება სტრასბურგის სასამართლოს გადაწყვეტილებაზე, რომ ამწუთებში ჩემს სახლში ჩხრეკაზე შედიან. მიდით ბიჭებო მიაწექით, ჩვენ მაინც გავიმარჯვებთ!!!”, — წერს დავით კეზერაშვილი სოციალურ ქსელში.

სტრასბურგის სასამართლოს გადაწყვეტილებით, უსამართლო არ ყოფილა გადაწყვეტილება, რომელიც უზენაესმა სასამართლომ გამოიტანა საქართველოს თავდაცვის ყოფილი მინისტრის, დავით კეზერაშვილის საქმეზე. უზენაესმა სასამართლომ კეზერაშვილი თავდაცვის სამინისტროს ერთ-ერთ საწვრთნელ პროექტში 5 მილიონ 60 ათასი ევროს გაფლანგვის საქმეზე დამნაშავედ ცნო.