"ღია საზოგადოების ფონდის“ იურისტი საბა ბრაჭველი 5-დღიან საპროტესტო აქციებს აჯამებს და წერს, რომ ამ ხნის განმავლობაში 250-ზე მეტი ადამიანი მხოლოდ თბილისშია დააკავეს. აქედან ყველა ნაცემია. კლინიკაში გადაყვანილებიდან ყველას ტვინის შერყევა აქვს, ხშირად ცხვირისა და ყბის მოტეხილობებით, ხოლო 22 წლის ბიჭი სიკვდილს ებრძვის იმის გამო, რომ გაზის კაფსულა მოარტყეს თვალში. მისივე თქმით, დაკავებულებს დასამცირებლად ფოტოებს და ვიდეოებს უღებენ.

"თუ ოცნების პროპაგანდისტებმა თქვენი საინფორმაციო ველიც დააბინძურეს და კარგად ვერ ხვდებით, რა ხდება:

22 წლის ბიჭი სიკვდილს ებრძვის იმის გამო, რომ გაზის კაფსულა მოარტყეს თვალში;

250-ზე მეტი ადამიანი მხოლოდ თბილისშია დაკავებული. ყველა ნაცემია. კლინიკაში გადაყვანილებიდან ყველას ტვინის შერყევა აქვს, ხშირად ცხვირისა და ყბის მოტეხილობებით;

განსაკუთრებით სასტიკი ცემა დაკავების შემდეგ იწყება. დაკავებულები აჰყავთ "მარშუტკებში", სადაც სპეცრაზმელები ჯგუფურად, როტაციით ურტყამენ, აფურთხებენ, აგინებენ, ემუქრებიან გაუპატიურებით;

ცემა სისხლის გუბეებამდე გრძელდება. შემდეგ დაკავებულებს ატარებენ კორიდორში, სახისა და ზურგის არეში სათითაოდ ურტყამენ წიხლებს. ნაცემების ერთ ჯგუფს მარშუტკაში გახსნილი გაზის ბალონიც შეუგდეს;

დაკავებულებს დასამცირებლად უღებენ ფოტოებს და ვიდეოებს. ხდიან ფეხსაცმელებს, ართმევენ (ძარცვავენ) ტელეფონებს, საათებს, მზის სათვალეებს;

ნაცემი იმდენია, რომ ინგოროყვადან პაციენტების ნაადრევად გამოშვება უწევთ, ახალი დაკავებულების მიღება რომ შეძლონ.

ამის შემდეგ თუ შენ ჩვეულებრივად აგრძელებ ცხოვრებას, ის მაინც ნუ გაგიკვირდება, რომ ჩვენ ვერ ვახერხებთ ამას.

დაუსჯელი ძალადობა ამ ქვეყანაში უნდა დასრულდეს.

არჩევნების მიტაცება ამ ქვეყანაში უნდა დასრულდეს.

ხალხთან "დუბინკების" ენით საუბარი უნდა დასრულდეს.

ხელისუფლება უნდა ეკუთვნოდეს ხალხს", — წერს სოციალურ ქსელში საბა ბრაჭველი.

შეგახსენებთ, რომ ღია საზოგადოების ფონდის იურისტი საბა ბრაჭველი 29 ნოემბრის აქციაზე თავად დაშავდა სპეცრაზმისგან გასროლილი რეზინის ტყვიით. ბრაჭველს დაზიანება ჰქონდა თვალთან და სახის არეში.