შინაგან საქმეთა სამინისტროს გენერალურმა ინსპექციამ თანასწორობის მოძრაობის აღმასრულებელი დირექტორის, ლევან ბერიანიძისა და ორგანიზაციის წევრის, თორნიკე კუსიანის, დაკავებისას პოლიციის მხრიდან შესაძლო ძალის გადამეტებაზე მოკვლევა დაიწყო. ამის შესახებ On.ge-ს უწყებაში განუცხადეს.

შსს აცხადებს, რომ მიმდინარე წლის 25 აგვისტოს, გამთენიისას, ბათუმის ბულვარში, კლუბ სოჰოს მიმდებარე ტერიტორიაზე, დაუდგენელი პირები ერთმანეთს ფიზიკურ და სიტყვიერ შეურაცხყოფას აყენებდნენ. ადგილზე მისულ სამართალდამცველებს კი ბერიანიძე და კუსიანი არ დაემორჩილნენ.

"2 მოქალაქე, რომლებიც განსაკუთრებული აგრესიით გამოირჩეოდნენ, არ დაემორჩილნენ პოლიციელების კანონიერ მოთხოვნას, დაეცვათ წესრიგი, სამართალდამცველებს წინააღმდეგობა გაუწიეს და სიტყვიერი შეურაცხყოფა მიაყენეს, რის გამოც პოლიციელებმა 1990 წელს დაბადებული ლ.ბ. და 1989 წელს დაბადებული თ.კ. საქართველოს ადმინისტრაციულ სამართალდარღვევათა კოდექსის 166-ე და 173-ე მუხლების თანახმად დააკავეს" - აცხადებს შსს და ირწმუნება, რომ დაკავებულები სამართალდამცველებისადმი სიტყვიერი შეურაცხყოფის მიყენებას პოლიციის განყოფილებაში გადაყვანის შემდეგაც განაგრძობდნენ.

შსს-ს ცნობით, ალკოტესტით შემოწმების შედეგად, კუსიანს და ბერიანიძეს ალკოჰოლური თრობა დაუდგინდათ. პოლიციის განყოფილებაში ლევან ბერიანიძემ სამართალდამცველებს განუცხადა, რომ კლუბ სოჰოს მიმდებარე ტერიტორიაზე, მას ფიზიკური შეურაცხყოფა მიაყენეს და დამნაშავის ამოცნობა შეეძლო.

აღნიშნულ ფაქტზე გამოძიება საქართველოს სსკ-ის 126-ე მუხლით დაიწყო, რაც ძალადობას გულისხმობს.

რაც შეეხება, აღნიშნული პირების მხრიდან პოლიციის თანამშრომლების მიმართ გამოთქმულ პრეტენზიას, საკითხს უკვე სწავლობს შსს-ს გენერალური ინსპეცია.

დაკავებულები აცხადებენ, რომ მათ ჯერ უცნობმა პირებმა სცემეს ბათუმის ბულვარში, ხოლო შემდეგ მათზე ფიზიკური და სიტყვიერი შეურაცხყოფის მიყენება განყოფილებაში პოლიციამ განაგრძო. ბერიანიძემ და კუსიანმა ადვოკატს ასევე უთხრეს, რომ შსს-ს თანამშრომლები მათზე ფიზიკური ძალადობის ფაქტს შეესწრნენ და არაფერი მოიმოქმედეს. ადვოკატი ნინო ბოლქვაძე აცხადებს, რომ ლევან ბერიანიძე პოლიციამ ჰომოფობიურ ნიადაგზე სცემა.