რადიო თავისუფლების ინფორმაციით, დღეს გაწერეს კლინიკებიდან ონლაინგამოცემა პუბლიკის ჟურნალისტი, ალექსანდრე ქეშელაშვილი და ტვ პირველის ჟურნალისტი მარიამ გაფრინდაშვილი. ექიმების მეთვალყურეობის ქვეშ რჩება ფორმულის ჟურნალისტი გურამ როგავა.

"ბეწვზე ვარ გადარჩენილი, რომ არ დავკარგე მგრძნობელობა ოთხივე კიდურში. იყო ამის საფრთხე, უბრალოდ ის დაზიანება, რაც მაქვს, ქმნიდა ამის რისკებს. ამ დროისთვის მიმდინარეობს ჩემზე დაკვირვება. ბევრი ომი, კონფლიქტი გამიშუქებია, მათ შორის საპროტესტო აქციები და ასეთი დამოკიდებულება ჟურნალისტების მიმართ არ მახსენდება", — ამბობს გურამ როგავა.

ალექსანდრე ქეშელაშვილს წოლითი რეჟიმი აქვს. ის პოლიციამ დააკავა და ფიზიკურად გაუსწორდა 28 ნოემბერს რუსთაველის გამზირზე მიმდინარე აქციაზე, რა დროსაც რეპორტიორი სპეციალური საშუალებებით დემონსტრანტების დაშლის ამსახველ ვიდეომასალას იღებდა. დაკავების შემდეგ ალექსანდრე ქეშელაშვილი ხელწერილით გაათავისუფლეს.

მარიამ გაფრინდაშვილი ინგოროყვას კლინიკაში, გუშინ 29 ნოემბერს შეიყვანეს. მან სამედიცინო დაწესებულება დღეს, 30 ნოემბერს დატოვა. ჟურნალისტს მსუბუქი ტვინის შერყევა აქვს. მარიამ გაფრინდაშვილმა თავის არეში დაზიანებები აქციის გაშუქებისას მიიღო.